Nog ’n vragmotor het vanoggend onder die berugte Elgin-brug in Kemptonpark vasgesit.
Ten spyte van die herhalende aard van hierdie voorvalle, het die Ekurhuleni-metro tot dusver geen daadwerklike stap geneem om met hierdie ernstige en aanhoudende openbare veiligheidsrisiko te handel nie.
Alhoewel die VF Plus wag op amptelike statistiek van die Ekurhuleni-metropolisie (EMPD), dui plaaslike verslae daarop dat daar reeds meer as 27 soortgelyke voorvalle vanjaar was.
Die gevaar wat dit skep is wesenlik en die VF Plus herinner die publiek aan die tragiese ontploffing op 24 Desember 2022, toe ’n brandstoftenkwa met vloeibare petroleumgas onder ’n spoorwegbrug in Boksburg vasgesit en ontplof het.
Agtien mense is dood en 37 beseer. Só ’n ramp mag nie weer plaasvind nie.
Elke voorval stel nie net die lewe van die bestuurder in gevaar nie, maar ook dié van motoriste, inwoners en nooddienspersoneel.
Die afwesigheid van duidelike waarskuwingstekens, fisieke versperrings of afdwingbare hoogte-beheermaatreëls is ’n skreiende bewys van die Ekurhuleni-metro se versuim om sy inwoners te beskerm.
Die VF Plus waarsku dat Ekurhuleni nie langer hierdie probleem kan ignoreer en met mense se lewe dobbel nie.
Die party sal die ANC- en EFF-koalisieregering direk aanspreeklik hou vir enige toekomstige lewensverlies wat spruit uit hul versuim om op te tree.
Hierdie situasie verg onmiddellike ingryping – of dit nou deur beter padtekens, strukturele beskerming of die herleiding van verkeer is.
Om te wag tot nóg ’n tragedie plaasvind voordat daar opgetree word, sal nie net nalatig wees nie, maar onvergeeflik wees.
