Die VF Plus gaan Amazon Web Services (AWS) se vereiste dat ondernemings wat aan sy Suid-Afrikaanse Equity Equivalent Investment Programme (EEIP) wil deelneem, 100% in swart besit moet wees, onder die aandag van die Amerikaanse owerhede bring.
AWS het self bevestig dat volle swart eienaarskap ’n minimum toelatingsvereiste vir die program is. Dit beteken dat ’n Suid-Afrikaanse onderneming toegang kan verloor bloot omdat een aandeelhouer nie volgens die voorgeskrewe rasseklassifikasie kwalifiseer nie.
Die VF Plus sal daarom die Amerikaanse ambassadeur in Suid-Afrika, L. Brent Bozell III, formeel nader en versoek dat die aangeleentheid na die toepaslike Amerikaanse owerhede verwys word.
Die vraag is nie noodwendig of AWS Amerikaanse wetgewing oortree nie, maar of ’n multinasionale maatskappy en federale kontrakteur se toepassing van ’n absolute rassevereiste buite die VSA versoenbaar is met die Amerikaanse regering se huidige beleid oor rasgegronde diskriminasie in kontraktering en programdeelname.
President Donald Trump se Uitvoerende Bevel 14398 van 26 Maart 2026 bepaal onder meer dat federale kontrakteurs nie aan rasdiskriminerende Diversiteit, Gelykheid en Insluitings-aktiwiteite (DEI) mag deelneem nie.
Dit sluit verskillende behandeling op grond van ras in kontraktering en programdeelname in.
Hierdie beleidsraamwerk bied dus ’n relevante konteks waarbinne die aangeleentheid ondersoek kan word.
Die VF Plus vra terselfdertyd dat AWS en die departement van handel, nywerheid en mededinging duidelik verduidelik waar die 100%-vereiste vandaan kom en of dit ’n direkte vereiste is van die Suid-Afrikaanse USBEB-regulasies, ’n regeringsvoorwaarde, of ’n besluit van AWS self.
Hierdie onderskeid is belangrik, want ware transformasie en bemagtiging behoort nie mense permanent volgens ras te klassifiseer en geleenthede op grond daarvan toe te ken of te weier nie.
Die VF Plus glo in ’n vrye mark, gelyke behandeling, entrepreneurskap, meriete en geleenthede vir almal.
Suid-Afrika het meer belegging, entrepreneurs en werkskepping nodig – nie nuwe rassegrense wat ekonomiese deelname beperk nie.
Die VF Plus se boodskap is eenvoudig: ’n Persoon se ras mag nooit die toegangskaartjie tot ’n ekonomiese geleentheid wees nie.
