lidmaatskaponderskrywing

ARTIKEL 3: MISSIE

Die Vryheidsfront Plus is onherroeplik verbind tot die verwesenliking van gemeenskappe, in die besonder die Afrikaner, se internasionaal erkende reg op selfbeskikking, territoriaal en andersins, die handhawing, beskerming en uitbouing van hulle regte en belange, asook tot die bevordering van die reg op selfbeskikking vir alle gemeenskappe in Suid-Afrika gebind deur ‘n gemeenskaplike taal- en kultuurerfenis.

ARTIKEL 18.2.2 Die stigtingsgrondslag van die Vryheidsfront Plus, naamlik:

18.2.2.1 Dat alle lede aanvaar dat God-Drie-Enig oor die lotgevalle van volke en nasies beskik en dat ons as volksgenote onderneem om tot eer van God te leef;
18.2.2.2 Dat Afrikanervolkseenheid bevorder moet word;
18.2.2.3 Dat die Afrikanervolk se reg op selfbeskikking, dit wil sê die reg om in sy eie staat oor homself te regeer, nagestreef sal word as ‘n ononderhandelbare reg;
18.2.2.4 Dat ‘n eenheidstaat en enige ander staatsvorm waarbinne andere staatkundig oor die Afrikanervolk kan regeer en waar hy deur ander verswelg mag word, vir die Vryheidsfront Plus onaanvaarbaar is;
18.2.2.5 Dat wet en orde só gehandhaaf moet word dat vrede en veiligheid gewaarborg en misdaad en geweld doeltreffend beveg word;
18.2.2.6 Dat enige vorm van Kommunisme verwerp word en met alle mag tot die beskikking van die Vryheidsfront Plus beveg sal word;
18.2.2.7 Dat ‘n Konfederale beleid vir Suider-Afrika nagestreef en bevorder sal word.

ARTIKEL 18.2.3 Die volgende verklaring van lojaliteit:

18.2.3.1 Ek verbind my uit vrye wil om onverdeelde lojaliteit aan die Vryheidsfront Plus te betuig en om die verpligtinge verbonde aan my lidmaatskap van die Vryheidsfront Plus volgens hierdie grondwet, getrou na te kom;
18.2.3.2 Ek onderwerp my aan die gesag en tug van die Vryheidsfront Plus se organisasie volgens hierdie grondwet;
18.2.3.3 Ek is nie lid van enige ander politieke party of organisasie met ‘n politieke strekking wat deur die Federale Raad geag word in stryd te wees met die beginsels of belange van die Vryheidsfront Plus nie;
18.2.3.4 Indien ek, nadat ek aangesluit het by die Vryheidsfront Plus, lidmaatskap aanvaar van enige ander politieke party of organisasie met ‘n politieke strekking wat deur die Federale Raad geag word in stryd te wees met die beginsels of belange van die Vryheidsfront Plus, dit geag sal word dat ek onmiddellik daarmee outomaties my lidmaatskap van die Vryheidsfront Plus beëindig het.