Die VF Plus het ware erns met taal en die erkenning daarvan vir al die mense van Suid-Afrika en het daarom met sy manifesbekendstelling vandag erkenning gegee aan al twaalf die land se amptelike tale wat gebaretaal insluit.
Die manifes was selfs in Braille beskikbaar wat beteken elke mens in Suid-Afrika kan die party se boodskap in sy of haar eie moedertaal hoor, lees en verstaan.
ʼn Professionele vertaaldiens het die manifes ook in Siswati, Setswana, Sepedi, Sesotho, Ndebele, Venda, Xhosa, Xitsonga en Zoeloe vertaal.
Die VF Plus glo dit is belangrik om sodoende erkenning te gee aan die feit dat Suid-Afrika ʼn land van minderhede is en dat die dowe, hardhorende en swaksiende gemeenskappe ook deel hiervan uitmaak.
Die feit dat net meer as 21% van die land se mense die grootste taal, Zoeloe, praat en 17% Xhosa, is ʼn bewys van die aantal minderhede. Afrikaanse en Engelse sprekers is net minder as 25% van die bevolking.
Dit is maklik om te praat oor die belangrikheid daarvan om gestremde gemeenskappe te bemagtig, maar gestremde persone sal kan getuig dit word nie altyd in die praktyk toegepas nie.
Die VF Plus wou ware uitvoering hieraan gee om sosiale inklusiwiteit en gelykheid te bevorder.
;
