Die VF Plus het verlede week as deel van sy oorsigrol ʼn tribunaal bygewoon om vas te stel of die voorgestelde ontwikkeling van Meyersdal-uitbreiding 31 in Alberton aan alle vereistes en wetgewing voldoen.
Verskeie inwoners het die party genader om hul besware te opper. Hulle is bekommerd oor die wettigheid van die projek, die gereedheid van infrastruktuur en die langtermyn impak van die ontwikkeling. Daar is ook vrees dat toegang tot die gebied beperk sal wees en dat beskermde plantspesies vernietig kan word.
Hierdie omgewings- en praktiese bekommernisse het tot groot ontevredenheid in die gemeenskap gelei.
Die Meyer-plaas waarop die ontwikkeling beplan word, het historiese waarde. Die plaas is reeds in 1850 gevestig en bevat grafte, ʼn plaashuis en buitegeboue. Die huis en omgewing is selfs deur die bekende skilder Pierneef op doek vasgelê.
Hierdie erfeniselemente maak die terrein argeologies en kultureel sensitief. Daarom het die Suid-Afrikaanse Erfenishulpbronagentskap (SAHRA) in ʼn skrywe bevestig dat enige grondontwikkeling groter as 0,5 hektaar sonder hul goedkeuring onwettig is.
Aktiwiteite wat erfenishulpbronne raak sonder die nodige permitte, is ʼn oortreding ingevolge die Nasionale Wet op Erfenishulpbronne. SAHRA is dus ongelukkig omdat die ontwikkeling ʼn erfenisterrein raak en nie sonder die vereiste goedkeurings mag voortgaan nie.
Tydens die tribunaal is beraamde kostes vir grootskaalse infrastruktuur genoem: R8,58 miljoen vir paaie, R61,69 miljoen vir stormwater, water en sanitasie, en R20,33 miljoen vir rioolinfrastruktuur wat verband hou met Ekurhuleni Water Care Company (ERWAT).
Die VF Plus het duidelikheid gevra oor wie verantwoordelik gaan wees vir hierdie befondsing. Indien die ontwikkelaar nie die kostes volledig kan dra nie, kan dit beteken dat die metro die projek moet afhandel, wat ʼn las op die belastingbetaler plaas.
Die VF Plus steun verantwoordelike ontwikkeling wat wettig, deursigtig en volhoubaar is. ʼn Projek van hierdie omvang mag egter nie voortgaan op grond van onvolledige nakoming van wetgewing, onseker infrastruktuurbefondsing of die moontlike verskuiwing van kostes na bestaande gemeenskappe nie.
Die party sal die saak noukeurig monitor en toesien dat inwoners se regte en die volhoubaarheid van die munisipaliteit beskerm word.
