Die VF Plus verwelkom die Ekurhuleni-metroraad se besluit om die omstrede tarief A.2-basiese heffing formeel te herroep. Die heffing het ’n vaste maandelikse elektrisiteitskoste op huishoudings, pensioenarisse en klein verbruikers afgedwing.
Sedert die instelling van die tarief het die VF Plus gewaarsku dat dit onbekostigbaar is, dat openbare deelname gebrekkig was, en dat dit regulatoriese en finansiële risiko’s sou meebring.
Hierdie bekommernisse is breedvoerig aan die burgemeester, die burgemeesterskomiteelid vir finansies en die speaker oorgedra.
Gemeenskappe regoor die metro is gemobiliseer en het in groot getalle openbare vergaderings bygewoon, besware ingedien en petisies onderteken. Die oorweldigende druk het die raad geen keuse gelaat as om die tarief terug te trek nie.
Die herroeping bevestig dat deursigtige openbare deelname en waaksame politieke toesig werklik saak maak. Dit is nie net ’n administratiewe regstelling nie, maar ’n herstel van openbare vertroue.
Die VF Plus betuig dank aan elke inwoner wat deelgeneem het en bly standvastig in die verdediging van huishoudings, pensioenarisse en klein verbruikers teen onregverdige tariefverhogings.
