Die VF Plus in die Tuinroete veroordeel die brutale dubbele moord van ’n bejaarde egpaar op ’n plaas in Glen Loerie, The Crags, naby Plettenbergbaai.
Die moord op die 71-jarige vrou en 77-jarige man is ’n tragiese voorbeeld van die toenemende geweld en brutaliteit waarmee landelike gemeenskappe te kampe het en wat toenemend na die Wes-Kaap oorspoel.
Weerlose bejaardes wat in hul eie huise aangeval word, wek ernstige kommer oor die veiligheid van inwoners van die Tuinroete.
Hierdie aanval beklemtoon die kwesbaarheid van mense op plase en in landelike gebiede. Dit onderstreep die dringende behoefte aan sterker, meer sigbare en proaktiewe polisiëring in die streek.
Die VF Plus verwelkom die vinnige optrede van die polisie en gemeenskapsveiligheidsnetwerke wat tot die inhegtenisneming van ’n verdagte gelei het. Dit toon die waarde van samewerking, maar verdoesel nie die groter probleem van stygende geweldsmisdaad en veiligheidsgebreke nie.
Die party doen ’n dringende beroep op die polisie om hulpbronne en polisiëringskapasiteit in landelike gebiede aansienlik te versterk om seker te maak dat sulke sake met die nodige erns ondersoek en vervolg word.
Gemeenskappe word intussen aangemoedig om waaksaam te bly en bestaande veiligheidsinisiatiewe te ondersteun, maar dit kan nooit ’n plaasvervanger wees vir doeltreffende staatsoptrede nie.
Die party sal aanhou druk uitoefen op die owerhede om daadwerklike maatreëls te tref sodat inwoners weer veilig in hul huise en gemeenskappe kan leef.
Die VF Plus spreek sy diepste meegevoel uit met die familie, vriende en die groter gemeenskap wat hierdie verlies moet verwerk.
Geen gesin of gemeenskap behoort sulke geweld te ervaar nie.
