Die VF Plus betreur die afsterwe van Mike van Rooyen van Volksblad, ʼn legendariese joernalis en spesialis-hofverslaggewer wat vir dekades oor die grootste hofsake in die Vrystaat berig het.
Mike was nie net ʼn verslaggewer nie, maar ʼn ware kenner van die reg en joernalistiek. Hy het respek afgedwing in die regsberoep, nie net vir sy diepgaande kennis van die regstelsel nie, maar vir sy foutlose beriggewing.
Sy werk het ʼn lig gewerp op die funksionering van ons regstelsel en het die gemeenskap ingelig gehou. Selfs die misdadigers het respek vir hom gehad. Hy was ʼn ware fakkeldraer van reg en geregtigheid.
Elke prokureur, regter en landdros het hom geken en gerespekteer. Sy werk was sy eer en sy nalatenskap is een van waarheid, geregtigheid en onwrikbare etiek. Hy was ʼn reus in sy veld.
Rus in vrede, Mike van Rooyen. Jou bydrae sal altyd in herinnering bly.
;
