Die Tshwane-metro se inwoners beleef tans ’n stelselmatige tegniese ineenstorting van sy kragnetwerk wat die stabiliteit van die hele metropool bedreig.
Terwyl die metro se kliënteverhoudingsbestuur-verslag (CRM) vir die tweede kwartaal van 2025/2026 ’n suksesvolle beeld probeer skep met ’n beweerde 92% reaksie op publieke navrae, vertel die werklike syfers ’n heel ander storie.
Die departement vir energie en elektrisiteit se voltooiingsyfer vir kragfoute het tot slegs 37% gedaal, met meer as 12 000 tegniese versoeke wat reeds langer as 90 dae uitstaande is.
Die kern van die krisis lê by ’n kritieke tekort aan geskoolde personeel. Tshwane beskik oor 55 substasies van 132kV (streek 5 en 7 uitgesluit), maar slegs 26 gekwalifiseerde tegnici met die nodige magtiging om op die hoëspanningsnetwerk te werk. Dit beteken minder as een gekwalifiseerde beampte vir elke twee substasies.
Hierdie tekort maak dit fisies onmoontlik om foute betyds te herstel en laat inwoners dae lank sonder elektrisiteit. Dit skep boonop ’n gevaarlike situasie waar ongemagtigde personeel onder druk geplaas kan word om hoë-risiko werk te doen – ’n direkte skending van die Wet op Beroepsgesondheid en Veiligheid.
Terwyl miljoene rande bestee word aan nuwe infrastruktuurprojekte soos die Wildebeest-toevoer, word die instandhouding van die bestaande netwerk en die ontwikkeling van noodsaaklike mensekapitaal ernstig afgeskeep.
Die VF Plus dring daarop aan dat die metro onmiddellik eksterne kundiges uit die privaatsektor inskakel om hierdie kunsmatige tekort aan te vul. Sonder dringende en praktiese optrede gaan Tshwane se kragnetwerk verder in duie stort.
