Inwoners van die Emalahleni-plaaslike munisipaliteit word daagliks gekonfronteer met water- en kragonderbrekings, terwyl munisipale tariewe bly styg en die munisipaliteit se finansiële posisie versleg.
Die munisipaliteit verskaf min tot geen proaktiewe kennisgewings oor diensontwrigtings nie. Inwoners word in die donker gelaat – letterlik en figuurlik – en kan nie hul daaglikse lewe, ondernemings of die versorging van kwesbares beplan nie.
Die omvang van die krisis is skokkend:
• Byna 50% van die dorp se water gaan verlore weens lekkasies, verouderde pype en onwettige aansluitings.
• Reservoirs loop gereeld leeg, waterdruk is dikwels te laag of die toevoer stop heeltemal. Inwoners kla ook oor vuil, troebel kraanwater.
• Die rioolstelsel kan nie die las hanteer nie. Rou riool loop in strate en selfs in inwoners se erwe in.
• In November 2025 het die Mpumalanga-hooggeregshof die munisipaliteit met R650 miljoen beboet omdat rou riool jare lank in riviere gestort is. R500 miljoen daarvan moet vir rehabilitasie gebruik word.
• Omtrent ’n derde van die munisipaliteit se elektrisiteit gaan verlore weens ou transformators, meter-peuterery en vandalisme.
• Die munisipaliteit skuld Eskom reeds meer as R12 miljard, terwyl slegs sowat die helfte van inwoners hul rekeninge betaal.
• Vullisverwydering het in baie gebiede ineengestort, met sakke wat weke lank in die strate lê.
Hierdie mislukkings skend inwoners se grondwetlike reg op skoon water, ’n gesonde omgewing en billike dienslewering.
Die VF Plus het reeds ’n klag aan die munisipale bestuurder, Humphrey Sizwe Mayisela, gestuur. Die party eis dat die infrastruktuur dringend gestabiliseer word, dat ’n behoorlike kommunikasieprotokol ingestel word en dat ’n duidelike aksieplan met tydlyne voorgelê word.
Die enigste manier om egter dienslewering in Emalahleni te herstel, is om die ANC by die stembus uit te stem en ’n nuwe regering te kies wat werklik omgee vir elke inwoner.
Die VF Plus bied ’n alternatief van verantwoordbare bestuur, deursigtige finansies en toegewyde dienslewering wat die regte van inwoners op skoon water, betroubare krag en ’n gesonde omgewing beskerm.
