Die VF Plus sal nie langer onwettige elektrisiteitsaansluitings in die Ekurhuleni-metro duld nie en daarom is verlede week druk op die munisipaliteit geplaas om die probleem aan te spreek.
Die gevolg was dat sowat ʼn duisend onwettige aansluitings in die Witfield- en Balmoral-gebied verwyder is.
Die VF Plus het verlede week ʼn klag van ʼn inwoner van Witfield ontvang. Die metro is dadelik in kennis gestel waarna die onwettige verbindings hoofsaaklik in Wit Deepweg en Hoofrifweg verwyder is.
Die metro beplan ʼn tweede operasie in die Lillanton- en Balmoral-gebied nadat hulle die operasie weens reën moes staak.
Na ʼn ondersoek het dit aan die lig gekom dat winkels in Hoofrifweg, wat hoofsaaklik deur buitelanders besit word, die sondebokke is en gratis elektrisiteit bekom ten koste van wetsgehoorsame inwoners.
Ongemagtigde elektrisiteitskabels is vanaf ʼn verkeerslig in Hoofrifweg na die winkels gelei.
In nog ʼn voorval is elektrisiteit deur winkeleienaars van ʼn lamppaal in Urwinstraat verkry.
Onwettige elektrisiteitsverbindings hou die volgende risiko’s vir die munisipaliteit in:
• Veiligheidsgevare: Ongemagtigde verbindings kan lei tot brande en elektrisiteitsprobleme wat lewens en eiendom in gevaar stel.
• Inkomsteverlies: Die munisipaliteit verloor inkomste uit onaangetekende elektrisiteitsverbruik.
• Oorlading van infrastruktuur: Onwettige verbindings kan die kragnetwerk oorlaai wat lei tot kragonderbrekings en skade aan infrastruktuur. Dit bring duur herstelwerk mee.
• Regs- en reguleringskwessies: Munisipaliteite kan regs- en reguleringuitdagings in die gesig staar as hulle versuim om onwettige verbindings aan te spreek wat lei tot potensiële boetes.
• Sosiale en ekonomiese impakte: Die voorkoms van onwettige verbindings kan ‘n kultuur van wetteloosheid bevorder en gemeenskapsvertroue in munisipale bestuur ondermyn.
VF Plus sal hierdie situasie monitor en seker maak dat meer operasies plaasvind om die belange van die gemeenskap te beskerm.
Die VF Plus moedig inwoners aan om onwettige kragverbindings deur middel van die Ekurhuleni-toep of hul raadslid in die omgewing aan te meld.
