Die Ekurhuleni-metro behandel behoeftige inwoners soos stiefkinders deur hul swaarder te belas sodra hulle meer as die minimum hoeveelheid gratis krag van 50 eenhede gebruik.
Die metro beloof al vir jare om behoeftige inwoners te beskerm deur aan hulle spesiale tariewe te bied.
Die feite is egter die volgende:
| Maandelikse kragverbruik | Behoeftiges | Gewone verbruikers |
| Verbruikersblok: 0 – 50 kWh | R0,00 | R2,5865 |
| Verbruikersblok: 50 – 600 kWh | R2,5861 | R2,5865 |
| Verbruikersblok: 600 – 700 kWh | R4,3956 | R4,0341 |
| Verbruikersblok: 700+ | R12, 3889 | R10,4287 |
| Enkelkoers in die geval van ‘n faktureringstelsel wat nie die blokkoers kan akkommodeer nie | R2,7356 | R2,7061 |
Dit beteken sodra ’n arm huishouding sy 50 eenhede gratis krag gebruik het, word hy onmiddellik met hoër tariewe gestraf en moet ook die basiese fooi van R109 betaal.
Dit is onregverdig vir behoeftige gesinne met kinders, arm bejaardes of mense wat van die huis af werk en studeer.
Die metro kan nie langer voortgaan om armes te straf nie. Die VF Plus dring daarop aan dat die metro die diskriminerende tariefstruktuur herevalueer.
Dit is onregverdig en onaanvaarbaar dat behoeftige huishoudings meer per krageenheid moet betaal as meer gegoede huishoudings sodra hulle die minimum drempel oorskry.
Die VF Plus sal druk op die Ekurhuleni-metro plaas om die herevaluasie as ʼn prioriteit te hanteer om so behoeftiges regverdig te behandel.
