Die VF Plus het vandag tydens ’n raadsvergadering gewaarsku dat die Ekurhuleni-metro se plan om skoonmaak- en sekuriteitsdienste in te kontrakteer, ernstige finansiële en bestuursrisiko’s inhou.
Indien die projek onsuksesvol is, kan dit die metro se reeds gespanne begroting verder onder druk plaas en dienslewering benadeel.
Die raad het die skepping van meer as 590 nuwe poste goedgekeur, insluitend skoonmakers en sekuriteitspersoneel. Hierdie besluit verbind die metro tot meer as R210 miljoen per jaar in salariskoste sonder om bykomende uitgawes soos oortyd, voordele, uniforms, opleiding en langtermynverpligtinge soos pensioene en verlof te verreken.
Hierdie koste kan die salarisrekening van die metro ingrypend verhoog.
Daar bestaan geen gedetailleerde kostevergelyking wat bewys dat die gebruik van interne personeel goedkoper is as kontrakteurs nie. Bestaande begrotings is boonop reeds met 50% verminder om kontrakte te finansier, wat verdere druk op die metro se finansies plaas.
Personeelaanstellings behoort op bekostigbaarheid gegrond te wees, maar die huidige plan ignoreer hierdie beperking en skep langtermyn-finansiële verpligtinge wat moeilik omkeerbaar is. Pensioene, gewone voordele en verlofbetalings is vaste laste wat die metro vir jare sal moet dra.
Die skepping van honderde nuwe poste sonder streng meriete-gegronde aanstellings kan ook die deur oopmaak vir kaderontplooiing en onreëlmatige praktyke.
Dit beteken dat die salarisrekening kan groei sonder dat dienslewering werklik verbeter wat ’n werkskeppingskema ten koste van inwoners is.
Hoewel interne vermoë op die lang termyn sekere voordele kan bied, sal dit sonder streng finansiële toesig Ekurhuleni se finansiële probleme net vererger.
Die VF Plus se steun sal slegs op voorwaardelik deursigtige, meriete-gegronde aanstellings en meetbare verbeterings in dienslewering berus.
Indien dit reg in werking gestel word, kan dit die metro versterk.
Indien nie, sal dit Ekurhuleni verder in skuld en wanbestuur dompel.
