Die VF Plus verwelkom die tersydestelling van die kindermoordenaar en oud-polisieman Marius van der Westhuizen se parool.
Dit is die regte besluit en wys wat ʼn effektiewe minister kan doen om geregtigheid te laat geskied in belang van die mense van Suid-Afrika.
Die korrektiewe toesig-en-paroolhersieningsraad het vandag sy besluit hieroor bekend gemaak nadat die minister van korrektiewe dienste, dr. Pieter Groenewald, onlangs gevra het dat die paroolbesluit oor Van der Westhuizen na die hersieningsraad terugverwys word.
Van der Westhuizen is in 2011 tot 24 jaar gevangenisstraf gevonnis weens die moord op sy drie kinders, Bianca (16), Marius Eben (5) en Antoinette (21 maande).
Suid-Afrika se mense is uitgelewer aan hoë vlakke van geweldsmisdaad, ontoereikende strawwe en ondeurdagte paroolvrylatings. In hierdie geval sou dit ook ʼn vergryping van geregtigheid wees om iemand vry te laat skaars dertien jaar ná die koelbloedige moord op sy drie kinders.
Soos in hierdie geval, kan nie net die regte van paroolaansoekers in aanmerking geneem word nie. Daar moet ewe veel gewig geplaas word op die belange van die gemeenskap en slagoffers soos die kinders se ma, Charlotte, wat die aansoek teengestaan het omdat sy vrees vir haar lewe.
In Van der Westhuizen se geval is die slagoffer-impakverslag (van mev. Van der Westhuizen) nie eens oorweeg nie.
Die VF Plus doen daarom ʼn beroep op die minister om toe te sien dat die paroolstelsel hersien word sodat almal in die proses regverdig behandel word.
Die VF Plus sou ook wou sien dat daar herbesin word oor strawwe, veral vir gewelds- en seksuele misdrywe, wat soms skokkend ontoereikend is. Dit kom neer op ʼn totale hersiening van die strafregstelsel wat selfs die administratiewe deel insluit.
Verlore dokumente kan byvoorbeeld ʼn groot rol speel in die uitkoms van iets soos ʼn paroolaansoek.
Wat straf aanbetref, is Van der Westhuizen byvoorbeeld gevonnis tot 24 jaar gevangenisstraf wat wesenlik verskil van ʼn lewenslange straf van 25 jaar wanneer parooloorweging ter sprake kom.
Die publiek ervaar die stelsel wat hom teen misdaad moet beskerm, toenemend as ʼn meganisme wat eerder meehelp om Suid-Afrika in ʼn misdaadparadys te omskep.
Dit moet verander en die regering van nasionale eenheid (RNE) bied ʼn goeie vertrekpunt hiervoor soos die besluit oor Van der Westhuizen illustreer.
;
