Die VF Plus in die Tuinroete neem kennis van die polisie se bevestiging dat die Bitou-onderburgemeester, Nokuzola Kolwapi, op 23 Junie 2026 in die hof moet verskyn op ’n klag ingevolge die Wet op Omgewingsbewaring (Wet 73 van 1989).
Die klag spruit uit ’n beweerde voorval einde 2025 waarin ’n vuurwapen in ’n openbare gebied afgevuur is. Die saak het groot openbare belangstelling en kommer ontlok.
As ’n verkose openbare verteenwoordiger beklee Kolwapi ’n posisie van hoë vertroue. Dit is daarom belangrik dat enige bewerings van wangedrag deeglik en deursigtig ondersoek word en dat die regsproses sy normale verloop neem.
Die party sal nie die hofproses vooruitloop nie, maar benadruk dat sake van openbare belang met die nodige erns en deursigtigheid hanteer moet word.
Soos met alle strafregtelike aangeleenthede, geld die beginsel dat ’n beskuldigde onskuldig geag word totdat skuld bo redelike twyfel in ’n hof bewys is.
Die VF Plus sal die hofverrigtinge met belangstelling volg.
