Die VF Plus was vandag die enigste party in die Mangaung-metroraad wat hom uitgespreek het teen die maksimum verhoging vir raadslede.
Hoewel die minister van samewerkende regering en tradisionele sake (Cogta) die boonste perke van vergoeding goedkeur, is dit belangrik om te beklemtoon dat dit ’n plafon is en nie ’n verpligting nie.
Die voorgestelde verhoging beloop 4% per raadslid, terugwerkend vanaf 1 Julie 2025. Dit verteenwoordig ’n beduidende bedrag geld wat eerder aangewend kon word om dienslewering te verbeter en infrastruktuur te herstel.
Die verslag maak dit duidelik dat enige verhoging deur die raad oorweeg en deur ’n duidelike goedgekeurde aanbeveling aanvaar moet word. Tog het die aanbeveling in hierdie geval slegs voorsiening gemaak vir kennisname.
Daar was dus geen formele besluit om die verhoging toe te pas nie.
Die VF Plus was die enigste party wat versoek het dat dit duidelik genotuleer word dat ons kennis neem van die verslag, maar gekant is teen die toestaan van die verhoging.
Die bykomende dokumente oor die verhoging is eers die vorige dag aan raadslede voorsien, minder as 24 uur voor die vergadering, in stryd met die vereiste kennistyd van 96 uur van die raad se staande reëls en ordes.
Hierdie wyse van hantering ondermyn behoorlike besluitneming en plaas ernstige vraagtekens oor die regmatige uitvoering daarvan.
Die VF Plus beskou hierdie hantering as ’n bewys van ’n raad wat sy prioriteite verkeerd het, terwyl Mangaung in ’n ernstige dienslewerings- en infrastruktuurkrisis verkeer met aanhoudende riooloorstromings, vervalle paaie, druk op die kragnetwerk en kritieke personeeltekorte wat basiese funksies lam lê.
Raadslede staan in diens van inwoners en moet seker maak dat finansiële hulpbronne aan dienslewering bestee word — nie aan selfverryking nie.
Die VF Plus se eerste prioriteit bly om die metro te stabiliseer en dienslewering te herstel, selfs al staan ons alleen teen die ANC.
