Die VF Plus steun die mosie vir die afwenteling van polisiemagte na die Stad Kaapstad ten volle.
Dié mosie het gister voor die raad van die Stad Kaapstad gedien en het oorweldigende steun ontvang.
Die mosie versoek die nasionale regering om ondersoekmagte, misdaadintelligensie en forensiese laboratoriumfunksies (veral vir vuurwapens) na Kaapstad oor te dra.
Dit sluit misdaadkategorieë in soos bendegeweld, vuurwapenmisdrywe, afpersing en dwelmhandel. Die doel is om die stad se metropolisie te bemagtig om die polisie te ondersteun.
Dit is ook veral noodsaaklik gesien in die lig van die nasionale krisis waarin die polisie tans verkeer.
Die polisie se agterstand met saakdossiere plaas ʼn enorme druk op speurders.
By van die polisiekantore wat met die meeste moorde in Kaapstad moet handel, moet ʼn speurder soms tot 300 of 500 dossiere hanteer. Dit dui op ʼn stelsel wat nie meer effektief funksioneer nie.
Die VF Plus is hoopvol dat die oordrag van polisiëringsmagte aan die Stad Kaapstad se veiligheids- en sekuriteitsdirektoraat met die kundige ondersteuning van die veiligheids- en sekuriteitsondersoekeenheid (SSIU) ʼn beduidende bydrae tot misdaadbekamping in die stad sal lewer.
Die afgelope week het ʼn onderhoud met oud generaal-majoor Jeremy Veary onthul hoe bendes die hoogste vlakke van die polisie in die Wes-Kaap binnegedring het met misdaadintelligensie wat by die prokureurs van bendelede beland wat tot die dood van ʼn informant gelei het.
Die SSIU se kundigheid kan hierdie korrupsie en getuiemoorde aanspreek.
Die VF Plus is trots om hierdie mosie te steun en doen ʼn beroep op die nasionale regering om saam te werk met die stad om Kaapstad se inwoners veiliger te maak.
Die party se dryfveer bly die verbintenis tot geregtigheid en gemeenskapsveiligheid.
