Die VF Plus eis onmiddellike optrede oor die forensiese verslag oor die Govan Mbeki-plaaslike munisipaliteit (Secunda, Bethal, Evander, Embalenhle, Kinross, Leandra, Trichardt, Charl Cilliers) wat op die jongste raadsvergadering ter tafel gelê is.
Die ondersoek deur Peyper Forensies het wydverspreide en doelbewuste korrupsie aan die lig gebring, met meer as 16 000 ongeoorloofde rekeningkonsolidasies en transaksies tussen 2022 en 2025 wat minstens R223 miljoen se inkomste laat verdwyn het deur skuld onregmatig weg te steek.
Minstens 340 rekeninge is bevoordeel terwyl meer as 4 600 inwoners benadeel is, wat direk bygedra het tot die munisipaliteit se finansiële ineenstorting.
Twaalf amptenare is as verantwoordelik geïdentifiseer, terwyl verskeie werknemers bedank het voor of tydens die ondersoek, wat aanspreeklikheid verder ondermyn.
Intussen ly inwoners onder onbetroubare watervoorsiening, gereelde kragonderbrekings en swak vullisverwydering omdat geld wat vir dienslewering bedoel was, deur korrupsie verlore gegaan het.
Die VF Plus steun die aanbeveling dat die saak onmiddellik na die polisie en die direktoraat vir prioriteitsmisdaadondersoeke verwys word, dat die digitale ouditspoor voltooi word en dat alle oorblywende forensiese werk dringend afgehandel word.
Kragtens die Munisipale Finansiële Bestuurswet moet verliese verhaal word, interne beheer versterk word, toegang tot die Munsoft-stelsel beveilig word en toesig oor inkomste- en finansiële afdelings verskerp word.
Die party eis dat regsprosesse dadelik vir alle bedrog en korrupsie ingestel word, dat alle ongeoorloofde skuldomkerings en konsolidasies geherfaktureer en verhaal word en dat skuldige amptenare permanent uit die openbare diens verban word.
Inwoners verdien ’n munisipaliteit wat fondse beskerm en dienste lewer, nie een waar korrupsie ongestraf voortwoeker nie.
Die VF Plus sal die implementering van elke aanbeveling noukeurig monitor en toesien dat dit sonder uitstel geskied.
