Die VF Plus het ʼn dringende vergadering met die burgemeester van die Matlosana-plaaslike munisipaliteit, James Tsolela, aangevra om die party se voorstelle oor die doeltreffende beskerming van kritieke infrastruktuur teen misdadige elemente te bespreek.
Munisipale dienslewering in groot gedeeltes van die munisipale gebied word toenemend ontwrig deur onder meer kabeldiefstal en die stroping van koper- en staalkomponente van die waterinfrastruktuur.
Stroperbendes plunder die plaaslike vervoermuseum deesdae ook helder oordag en dra stuk vir stuk van die inhoud weg.
Selfs historiese stoom-lokomotiewe word opgesaag en weggedra sonder enige optrede deur die ANC-geleide owerhede. Dit is ʼn absolute skande.
Daar was ʼn merkbare toename in hierdie soort misdaad oor die afgelope jaar.
Dienslewering in die ANC-beheerde munisipaliteit word verder gekortwiek deur gebrekkige begrotingsbeplanning.
Dit lei tot geldtekorte in die munisipale departemente verantwoordelik vir die instandhouding van infrastruktuur.
Die VF Plus sal daarop aandring dat die munisipaliteit ʼn behoorlik befondsde teen-misdaadstrategie vir die beskerming en behoud van kritieke infrastruktuur prioritiseer.
Die inwoners van Klerksdorp, Stilfontein, Orkney en Hartbeesfontein is geregtig op ʼn plaaslike regering wat verantwoordelik optree en alle gemeenskapsbates doeltreffend beskerm.
Matlosana verdien beter as die ANC.
;
