Die VF Plus veroordeel die optrede van die polisie se BBP-beskermingslede van adjunkpresident Paul Mashatile wat betrokke was by die aanranding van motoriste op die N1 in Johannesburg, ten sterkste.
Adj.pres. Mashatile het vandag in ’n amptelike verklaring bevestig dat hy kennis dra van die voorval en dat die lede wel aan hom toegewys is.
Luidens die verklaring het hy die nasionale polisiekommissaris, genl. Fannie Masemola, gevra om die voorval te ondersoek en die nodige stappe teen die lede te neem.
Vir die VF Plus laat hierdie misdadige boeliegedrag vrae ontstaan oor die opleiding en professionaliteit van die lede. Indien hulle professioneel opgelei was, sou hulle geweet het om hul humeur te beteuel, ongeag die situasie.
Dit is onaanvaarbaar vir lede van so ’n spesialiseenheid om op hierdie wyse op te tree en mense uit hul voertuie te sleep en aan te rand.
Dit skep boonop ’n sekuriteitsrisiko vir die persoon wat veronderstel is om beskerm te word.
Daar sal baie sterk opgetree moet word teen die betrokkenes. Hulle is duidelik nie geskik om te werk vir die BBP-beskermingsdiens nie en hulle sleep die naam van die eenheid deur die modder.
Die lede behoort onmiddellik geskors te word en daar moet dissiplinêr teen hulle opgetree word. Opod moet die aangeleentheid ook ondersoek.
Ek sal vra dat die parlement se portefeuljekomitee oor polisie die saak verder opvolg. Die minister sal moet verduidelik waarom die lede so aggressief opgetree het.
Die regering se bloulig-konvooie het reeds ’n swak reputasie onder die publiek opgebou en wat hier gebeur het, mag nie langer geduld word nie.
;
