Die VF Plus verwelkom die suksesvolle uitvoering van die hooggeregshof se bevel op 20 Augustus 2025 om die onwettige besetting van die voormalige Lyttelton-stadsaal, geleë op die hoek van Napierweg en Fountainlaan in Centurion, te beëindig.
Hierdie saal is sedert 2019 onwettig beset as ’n skuiling vir sowat 30 hawelose persone sonder enige formele huurooreenkoms met die Tshwane-metro.
Na bewering het ʼn nieregeringsorganisasie (NGO) die perseel beset en huur van kwesbare inwoners ingevorder.
Die Tshwane-metro se gesondheidsdepartement het die gerief as onbewoonbaar verklaar weens ernstige rioolprobleme, ophoping van onbeheerde afval en toestande wat siektes, misdaad en dwelmmisbruik aanmoedig.
Verdere ondersoeke het die teenwoordigheid van ongedokumenteerde buitelanders bevestig, wat die veiligheidsrisiko’s vererger het.
Die hof het op 8 Julie 2025 ’n bevel uitgereik dat alle onwettige inwoners die perseel binne 30 dae, teen 7 Augustus 2025, moes verlaat. Ná herhaalde weiering om te voldoen, het die Tshwane-metropolisie (TMPD) op 20 Augustus 2025 ingegyp om die bevel af te dwing.
Die besetters is na die Youth for Survival-skuiling verskuif, waar hulle toegang tot nodige ondersteuning en rehabilitasie sal kry.
Die Lyttelton-stadsaal, wat tans in ’n verwaarloosde toestand is, vereis dringende herstelwerk en beduidende beleggings om weer as ’n funksionele gemeenskapsgerief benut te kan word.
Die VF Plus bly toegewy aan die oppergesag van die reg, die beskerming van openbare bates en aan die waarborg dat die Tshwane-metro verantwoordbaar en deursigtig bestuur word tot voordeel van sy inwoners.
