Die ANC-beheerde Merafong-plaaslike munisipaliteit (Carletonville, Fochville, Wedela) het inwoners nou in ‘n langdurige en rampspoedige waterkrisis gedompel.
Twee reservoirs is heeltemal leeg, en ander is kritiek laag met ‘n gemiddelde watervlak van slegs 35%.
Dit is nie ‘n natuurramp nie, maar die direkte gevolg van jarelange roekelose wanbestuur, skuld van R1,6 miljard aan Rand Water en ‘n totale gebrek aan politieke wil om basiese infrastruktuur te onderhou.
Rand Water het watertoevoer met 40% verminder en weier tereg om dit te herstel totdat die munisipaliteit sy skuld betaal. Boonop vererger waterlekkasies, hoë somerverbruik en verouderde infrastruktuur die krisis.
Die huidige reservoirvlakke is skokkend:
• Blybank (4 ML): 0%
• Een Fochville-reservoir (5 ML): 0%
• Carletonville (2.5 ML): 20%
• Ander Fochville-reservoirs: 30–50%
• Welverdiend/Wedela: 70% (maar steeds onder druk)
Die 007-reservoir in Carletonville is al jare in onbruik weens sinkgate. Rehabilitasie, wat in 2024 voltooi moes wees, is nou tot Junie 2026 uitgestel weens kontrakteurbreuke, nuwe sinkgate en die munisipaliteit se finansiële onvermoë om projekte af te handel.
Die munisipaliteit belowe watertrokke om met die krisis te help, maar die VF Plus twyfel sterk aan sy vermoë om dit na te kom. Daar is reeds te min trokke om selfs skole en ouetehuise te bedien.
Die ouditeur-generaal (OG) se onlangse gekwalifiseerde ouditmening bevestig dat Merafong onder die ANC wanbestuur word en finansieel bankrot is. Daar is geen werklike poging om skuld te vereffen, inkomste in te vorder of infrastruktuur te red nie.
Inwoners verdien nie hierdie lyding nie.
Die ANC se versuim is ‘n skande en ‘n skending van basiese regte op skoon water.
Die VF Plus sal aanhou druk uitoefen en sal nie rus voordat aanspreeklikheid afgedwing word nie.
