Die watertoevoer na Kampersrus is ná twee weke van ernstige ontwrigting weens kitsvloede suksesvol herstel. Die vloede het die hoofpyplyn by ’n natuurlike fontein beskadig en die dorp in ’n noodsituasie gedompel.
Wat aanvanklik soos ’n verlammende krisis gelyk het, is oorkom weens die merkwaardige samewerking tussen die plaaslike gemeenskap, boere en die munisipaliteit.
Nadat die skade op 23 Januarie bevestig is, het inwoners en gemeenskapsleiers onmiddellik saamgespan om oplossings te vind.
Die Mopani-distriksmunisipaliteit se voorsiening van slegs een watertenkwa was onvoldoende en daarom was vinnige ingryping belangrik.
Terwyl die Hoedspruit-plaaswag en plaaslike boere vragmotors met watertenks beskikbaar gestel het, het die VF Plus terselfdertyd pype en laste ter waarde van R3 500 befonds om ’n uitlaat te skep vir noodwatervoorsiening.
Die herstelwerk was uitdagend. Die sterk stroom van die fontein het die proses vertraag, maar inwoners van Bedford Estates het die tegniese span ondersteun en die vloei met sandsakke herlei. Toe verdere lekkasies gevind is en die afwesigheid van ’n trekker-laaigraaf (TLB) die werk vertraag het, het David Swarts en sy span van die Jahara-rehabilitasiesentrum die pyplyn met die hand oopgegrawe.
Danksy hierdie gesamentlike poging is die finale herstelwerk betyds voltooi en die reservoirs kon weer gevul raak voordat die son gesak het.
Die VF Plus spreek sy waardering uit teenoor die Hoedspruit-plaaswag, plaaslike boere, mnr. Paul Malan vir sy koördinering, die Bedford Estates-inwoners en die munisipale spanne vir hul deurslaggewende bydrae.
Hierdie suksesverhaal bevestig dat ’n gemeenskap wat saamstaan, enige krisis kan oorkom.
