Inwoners van die Dipaleseng-plaaslike munisipaliteit (Balfour, Grootvlei, Greylingstad) is steeds in die duister oor die veiligheid van hul drinkwater.
Terwyl noodsaaklike infrastruktuur weens wanbestuur verval, hou die munisipaliteit kritieke data oor watergehalte terug wat direk verband hou met openbare gesondheid.
Volgens wetgewing is die munisipaliteit verplig om watergehalte gereeld te monitor en die publiek oor die uitslae in te lig. Tog word hierdie plig verontagsaam.
Die munisipale bestuurder, mnr. Lwazi Cindi, maak onafhanklike toetsuitslae herhaaldelik as “onakkuraat” af, ten spyte daarvan dat distriksdata dieselfde hoë vlakke van besmetting bevestig.
Dokumente wat onlangs van die Gert Sibande-distriksmunisipaliteit verkry is, bewys dat die water gereeld met riool en E.coli besmet is.
Die VF Plus voer self elke vier maande onafhanklike toetse uit wat dieselfde bevindinge toon.
Nog meer ontstellend is dat die munisipaliteit soms glad nie monsters vir toetsing indien nie. Dit beteken dat daar vir maande geen toesig oor die veiligheid van inwoners se drinkwater is nie.
Deur hierdie maandelikse uitslae te weerhou, verbreek die munisipaliteit sy wetlike verpligting tot deursigtigheid en die beskerming van openbare gesondheid. Dit plaas inwoners se lewe in gevaar.
Hierdie versuim is des te meer skokkend in die lig van ’n belegging van sowat R122 miljoen in die opgradering van die Fortuna-watersuiweringsaanleg. Dié gerief slaag steeds nie daarin om sy primêre mandaat na te kom nie naamlik die lewering van skoon, veilige drinkwater.
Fondse wat spesifiek toegewys is om kapasiteit vir Grootvlei en nuwe behuisingsontwikkelings te vergroot, het geen tasbare verbetering gebring nie. Inwoners ontvang steeds water wat verkleur is en soos rivierwater ruik.
Die voortdurende wanbestuur van die Fortuna-aanleg en die weiering om eerlik met die publiek te wees, is ’n ernstige aanklag teen die huidige administrasie.
Dit is eenvoudig onaanvaarbaar dat miljoene rande se belastinggeld bestee is terwyl inwoners gedwing word om water te gebruik wat ’n direkte gesondheidsrisiko inhou.
Die VF Plus dring daarop aan dat die munisipaliteit ’n konkrete plan vir infrastruktuur-rehabilitasie voorlê en dat alle maandelikse watergehalte-uitslae onmiddellik en deurlopend bekend gemaak word.
Die party het ook vrae ingedien wat tydens die komende raadsvergadering op 29 Januarie 2026 beantwoord moet word.
