Die VF Plus as ʼn voormalige koalisievennoot in die metroregering van Tshwane verwelkom die Arbeidshof se uitspraak dat die Suid-Afrikaanse Bedingingsraad vir Plaaslike Regering (SALGBC) onbillik opgetree het deur die metro se aansoeke om vrystelling van die 2021-loonverhoging af te wys.
Die uitspraak bevestig die verantwoordelike en beginselvaste optrede van die VF Plus in die vorige regering wat saam met sy koalisievennote die saak tot die einde verdedig het.
Alhoewel ander koalisievennote soos ActionSA en die ACDP hul steun onttrek het en eindelik ’n nuwe koalisie met die ANC en EFF gevorm het, het die VF Plus vasgestaan in sy verbintenis tot verantwoordelike finansiële bestuur en dienslewering.
Die Arbeidshof het bevind dat die raad die metro nie ’n regverdige geleentheid gegee het om sy saak te stel nie, en dat die finansiële inligting verkeerd vertolk is.
Die hof se uitspraak bevestig dat die rigting wat die VF Plus gevolg het, korrek en in belang van Tshwane se inwoners was.
ActionSA, wat beweer het dat hy miljarde vir die metro gespaar het, is nou blootgelê as ’n faktor wat verantwoordelike besluitneming belemmer eerder as bevorder het.
Die Vryheidsfront Plus het met sy optrede gewys dat die tersaaklike finansiële besluite gemeenskapsveiligheid en dienslewering direk sou raak en het opgetree om die inwoners van Tshwane eerste te stel.
;
