Oor die afgelope week het die VF Plus aan al die begrotingsdebatte in die Noord-Kaapse wetgewer deelgeneem.
Die klem was deurlopend op die moontlikhede wat die provinsie bied in teenstelling met wydverspreide armoede wat toenemend tot bendebedrywighede, dwelmmisbruik en tienerswangerskappe lei.
Dit skep ʼn bose kringloop wat gebreek moet word.
Onderliggend aan elke departement se begroting is die stelling dat niks deur die besit van geld vermag word nie, maar wel deur die vloei daarvan.
Soos besproeiing doeltreffend is as die watervloei sonder lekkasies plaasvind, is owerheidsbesteding doeltreffend as elke sent die werklike doel bereik.
Aan die positiewe kant beskik die Noord-Kaap oor reuse mynbouhulpbronne, landbougeleenthede, skouspelagtige toerismebestemmings en volop wind en sonskyn vir hernubare-energie.
Die nuwe hawe by Boegoebaai wat tans beplan word, is deel van die groen waterstofbedryf wat energievoorsiening in Suid-Afrika ingrypend kan verbeter.
Ontwikkeling in die provinsie word bemoeilik deur yl bevolking en uitgestrektheid. Infrastruktuur is duur om te vestig en te onderhou, terwyl inwoners onderwys- en werksgeleenthede moeilik bereik.
Dit is waar doeltreffende aanwending van owerheidsbesteding deurslaggewend is.
;
