"Die VF Plus verwelkom die aankondiging van die minister van finansies, Tito Mboweni, dat daar wel verligting vir belastingbetalers gaan wees, veral met betrekking tot die verandering in die inkomste-skale van persoonlike inkomstebelasting," sê dr. Pieter Groenewald, VF Plus-leier in reaksie op die minister se begrotingsrede.
"Dit sal broodnodige verligting bring aangesien dit baie mense se besteebare inkomste sal verhoog en sal meebring dat meer geld in die ekonomie bestee word wat groei kan stimuleer.
"Aan die negatiewe kant is dit teleurstellend dat die brandstofheffing verhoog word en dat die geleentheid weer nie gebruik is om ‘n sukkelende staatsentiteit soos die SAL te sluit en te privatiseer nie.
"Die brandstofheffing van 25 sent sluit in ‘n verhoging van 9 sent per liter vir die padongelukkefonds wat onaanvaarbaar is aangesien dié fonds ‘n totale mislukking is.
"Die VF Plus vra dat ‘n verpligte derdeparty-versekering vir alle motoreienaars eerder ingestel moet word as om voort te gaan met ‘n mislukte padongelukkefonds.
"Die minister neem sekere aansporings vir maatskappye weg wat veral die vervaardigingsektor nadelig sal raak, maar gaan voort met ‘n aantal positiewe aansporings soos ‘n ander belastingvoordeel vir die industriële sektor."
"Die feit dat die begrotingstekort al hoe groter word, is nie goeie nuus nie. Suid-Afrika bestee toenemend meer as wat sy inkomste is. Die staat se skuld gaan meer as 70% van die Bruto Binnelandse Produk uitmaak.
"Nasionale tesourie se vooruitskatting is dat die land ‘n groeikoers van 0,9% gaan hê. Dit beteken dat al die uitgawes en inkomstes gegrond is op ‘n groeikoers van 0,9%. Die realiteit is egter dat die groeikoers heel moontlik veel laer gaan wees as wat nasionale tesourie in die vooruitsig stel.
"Onvoorsiene faktore soos die korona-virus en beurtkrag, sal waarskynlik daartoe bydra dat die groeikoers veel laer as 0,9% sal wees wat sal lei tot ‘n veel groter begrotingstekort en finansieringskoste op skuld.
"Volgens die minister wil hy die staat se salarisrekening besnoei met R37,8 miljard in hierdie finansiële jaar en daarna altesame R160 miljard in die volgende drie jaar. Die vraag is of Cosatu en ander vakbonde hom sal toelaat om dit te doen aangesien Cosatu gister reeds gesê het hy sal oorlog verklaar teen ‘n afname in salarisverhogings.
"Die VF Plus stem saam dat Eskom gered moet word, maar geld van die staatsdiens-pensioenfonds mag nie daarvoor gebruik word nie. Ander fondse mag ook nie voorgeskryf word om in Eskom te belê nie."
"Die voorsiening wat weereens gemaak word vir ‘n reddingsboei vir die SAL is onaanvaarbaar en onbekostigbaar. Die redery moet nou geprivatiseer word aangesien dit die belastingbetaler jaarliks miljarde rand kos sonder om enige voordeel daarvoor te wys," sê Groenewald.
;
