Die VF Plus het ná volgehoue druk daarin geslaag om die DA-beheerde Drakenstein-plaaslike munisipaliteit (Gouda, Paarl, Saron, Wellington) te dwing om ook Afrikaans en isiXhosa as raadstale te erken en te gebruik.
Die party het volhard in sy stryd teen die miskenning van Afrikaans in die Drakenstein-raad as een van die elf grondwetlike landstale en een van die drie tale wat in die Wes-Kaapse grondwet erken word.
Vanaf 30 Junie is daar tolkdienste beskikbaar gestel om raadslede in staat te stel om aan debatte deel te neem in Afrikaans, Engels of isiXhosa.
Die VF Plus gaan ook ‘n stokkie steek voor die munisipaliteit se gebruik om alle amptelike munisipale dokumente slegs in Engels beskikbaar te stel.
Op navraag aan die munisipale bestuurder, dr. Johan Leibbrandt, oor wanneer die munisipaliteit besluit het om alle dokumentasie slegs in Engels beskikbaar te stel, het hy sy onkunde duidelik gemaak deur na Engels as Suid-Afrika se amptelike landstaal te verwys en dit as rede voor te hou vir die gebruik van Engels.
Ingevolge Artikel 6 van die Grondwet is dit duidelik ongrondwetlik en in besonder Artikel(3)(b) wat aan munisipaliteite die volgende voorskryf: “Munisipaliteite moet die taalgebruik en voorkeur van hul inwoners in ag neem.”
In Drakenstein se geval is 70% van die inwoners Afrikaanssprekend en is dit niks minder as reg nie om alle dokumente aan dié inwoners in hul moedertaal beskikbaar te stel.
Die VF Plus sal aanhou veg vir die gelyke grondwetlike beregtiging van Afrikaans.
;
