Internasionale vertroue in Suid-Afrika se sake-omgewing het drasties afgeneem sedert 2012 met swart ekonomiese bemagtiging (SEB) wat uitgewys is as die mees negatiewe faktor vir Europese beleggers in die land.
Dit blyk uit ‘n verslag van die Europese Unie (EU) se Kamer van Koophandel wat pas verskyn het. Die verslag is opgestel aan die hand van ‘n opname onder 211 plaaslike maatskappye in Europese besit en is gedoen deur die EU se Kamer van Koophandel en Nywerheid in Suid-Afrika. Bussiness Day het oor die verslag berig.
Adv. Anton Alberts, die VF Plus se parlementêre woordvoerder oor handel en nywerheid, sê dit bevestig die party se standpunt dat SEB tesame met ander faktore soos regstellende aksie (RA), die groot remskoene is wat ekonomiese groei in Suid-Afrika kniehalter.
“Die wêreld is besig om raak te sien wat in Suid-Afrika gebeur, en bevestig ook dat die jarelange pogings van die VF Plus om die internasionale gemeenskap hieroor in te lig deur onder meer voorleggings aan die Verenigde Nasies (VN) te doen, nie op dowe ore geval het nie.
“Ander negatiewe faktore vir beleggers is die wisselvalligheid van die rand en korrupsie in die regering. Beleidsveranderinge en onsekerheid wat dit skep asook rompslomp rondom werkpermitte is ook uitgewys as kwelpunte.
"Beleggersvertroue word verder ondermyn deur staatsinstellings wat nie na behore funksioneer nie. Die rigiede wetgewing vir maatskappye om aan SEB te voldoen en die prys wat daarvoor betaal word in terme van produktiwiteit, is egter bo-aan die lys van negatiewe faktore.
“Daar is wel sommige positiewe punte wat uitgelig is soos die land se goeie infrastruktuur, maar dit word oorskadu deur die wanbestuur van die regering. Twee-derdes van die respondente verwag dat korrupsie sal toeneem in die regering en ander regulatoriese owerhede.
“Die VF Plus sal aanhou druk plaas op die regering om weg te doen met SEB en RA. Solank dit op die wetboeke is, sal daar nie ekonomiese groei wees nie en sal miljoene mense weens die kortsigtigheid van die ANC werkloos en sonder hoop wees,” sê adv. Alberts.
Kontaknommers: 082 391 3117 / 083 419 5403
;
