Die VF Plus het buite stemming gebly met die 2026/27-begroting van die Langeberg-munisipaliteit omdat dit nie die belange van inwoners in ag neem nie en eerder ‘n geval is van ”melk die gewillige belastingbetaler”.
Die party is nie bereid om sy mandaat van verantwoordelike finansiële bestuur wat van die Langeberg-kiesers ontvang is, te ignoreer nie.
Daar is verskeie redes waarom die VF Plus nie die begroting gesteun het nie. Die belangrikste is omdat die proses van openbare deelname, soos voorgeskryf deur munisipale wetgewing, nie gevolg is nie.
Ongelukkig is die korrekte proses van wyksvergaderings waar die publiek insette kon lewer, nie soos in vorige jare gevolg nie en die munisipale bestuurder en sy administrasie het dit boonop erken.
Die VF Plus is nie tevrede met die proses waar ‘n kort vraelys deur blokleiers voltooi en ingedien is nie. Net tussen 700 en 800 is ingedien terwyl Langeberg ‘n inwonerstal van sowat 130 000 mense en sowat 25 000 huishoudings bedien. Dit kom daarop net dat net 0.03% van alle huishoudings ‘n inset kon lewer op ‘n munisipale begroting van R1.3 miljard.
Dit is duidelik dat besluite oor hoe hierdie begroting bestee word, net deur munisipale amptenare geneem word.
Tydens ‘n werkswinkel wat vooraf plaasgevind het, het die munisipale bestuurder, Danie Lubbe, en die burgemeester, Schalk van Eeden, ‘n onderneming gegee dat alle rolspelers (individue en organisasies), wat insette gelewer het, geantwoord sou word. Dit het nie gerealiseer nie.
Boonop het die meeste inwoners min of geen toegang tot die munisipaliteit se webwerf nie en is ‘n vergadering nie soos voorheen gehou waar inwoners vrae kon vra of insette lewer nie.
Hul regte is dus van hulle ontneem om ‘n bydrae te lewer.
Die VF Plus stel voor dat die munisipaliteit die begroting se goedkeuring uitstel vir twee weke sodat ‘n proses van openbare deelname kan plaasvind voordat die munisipale begroting finaal op 30 Junie voorgelê word vir goedkeuring.
Die VF Plus het ook op ‘n vorige raadsvergadering ‘n versoek gerig dat die eiendomswaardasierol van alle eiendomme in Langeberg oorgedoen moet word, maar die versoek is geweier hoewel daar erken is dat die munisipaliteit reeds 2 500 foute geïdentifiseer het.
Geweldig baie klagtes is ontvang van eienaars dat hulle geen korrespondensie hieroor ontvang het nie of dat hul eiendomme nooit besoek is nie.
Hierdie foutiewe waardasies het ‘n wesenlike invloed op die begroting. Hoewel die burgemeester ‘n verlaging van 21% in eiendomstariewe voorgehou het as ‘n groot besparing vir belastingbetalers, is die realiteit dat die verkeerde waardasies daartoe lei dat eiendomme verkeerdelik met 50% en meer in waarde gestyg het, ondanks statistieke wat toon dat eiendomme in die Wes-Kaap ‘n gemiddelde jaarlikse groei van net 5% toon.
Dit het daartoe gelei dat inwoners wat eiendomme besit, ‘n verhoging van 14.8% op eiendomsbelasting gaan betaal.
Die VF Plus dring derhalwe daarop aan dat die waardasieproses oorgedoen word in belang van inwoners met eiendomme en wat belasting betaal.
