Die VF Plus beskou die wanbetaling van die Gautengse departement van onderwys (GDE) aan die Gauteng Small Bus Operators’ Council (GASBOC) – die organisasie wat verantwoordelik is vir die vervoer van duisende leerders na skole – as skandelik en onverantwoordelik.
Duisende leerders, veral uit minderbevoorregte gemeenskappe, word direk deur die situasie benadeel.
Volgens ’n amptelike memorandum wat GASBOC op 31 Januarie 2026 uitgereik het, het die raad eenparig besluit om alle skoolvervoerdienste in Gauteng onmiddellik op te skort.
Die hoofrede is dat die GDE reeds meer as drie maande agterstallig is met betaling aan die vervoerders, ten spyte van kontrakverpligtinge wat vereis dat fakture binne 30 dae betaal word.
Boonop het die Gautengse departement van paaie en vervoer versuim om die nodige passasiersvervoerpermitte uit te reik, al het operateurs aansoeke ingedien en die vereiste fooie betaal.
Hierdie dubbele versuim het ernstige kontantvloeiprobleme veroorsaak: Operateurs kan nie meer bestuurders, personeel, voertuigfinansiers of diensverskaffers betaal nie, wat die voortbestaan van hul ondernemings in gevaar stel.
GASBOC beklemtoon die feit dat hul lede herhaaldelik in goeie trou met die GDE onderhandel het, maar dat die departement nie sy verpligtinge nagekom het nie en onrealistiese eise gestel het.
Die VF Plus sal nie toekyk hoe leerders op hierdie wyse van hul grondwetlike reg op basiese onderwys ontneem word nie.
Die party het reeds met die onderwysdepartement geskakel om dringende oplossings te vind en sal met ekonome en finansiële kundiges saamwerk om die departement se begroting te hersien en strategiese aanpassings voor te stel.
Die doel is dat befondsing vir leerdervervoer geprioritiseer en onmiddellik beskikbaar gestel word.
Hierdie krisis stuur ’n duidelike boodskap dat die ANC-regering van provinsiale eenheid nie die belange van leerders eerste stel nie. Dit is onaanvaarbaar, veral waar ouers geen alternatiewe vervoer kan bekostig nie.
Die VF Plus sal alles in sy vermoë doen om druk uit te oefen sodat agterstallige betalings vereffen word, permitte uitgereik word en busvervoer so gou moontlik hervat kan word.
