Slegs inspekteurs van die Tshwane-metro se departement van gesondheid mag informele straatverkopers en spaza-winkels inspekteer om toe te sien dat hulle voldoen aan die wetlike vereistes ten opsigte van voedselhantering en -verkope.
Hierdie inspekteurs moet voldoen aan vereistes en kwalifikasies om die werk te verrig.
Die waarskuwing volg nadat mense vandeesweek informele nedersettings besoek het sonder om die regte prosedures te volg.
Verskeie gevalle van voedselvergiftiging is aangemeld van skoolkinders wat onder meer koekies by straatsmouse gekoop het.
Ongekoördineerde besoeke deur mense wat nie deur die departement van gesondheid aangestel is nie, kan verwarring onder beide formele en informele ondernemings en straatsmouse veroorsaak.
Alvorens inspeksies uitgevoer word, moet die Tshwane-metro ʼn operasionele plan saamstel om alle belanghebbende departemente by die operasie te betrek.
Die metro se gesondheidsdienste het reeds ʼn strategiese plan saamgestel om hoë risiko-gebiede in al die sewe streke in die metro op ʼn meer gereelde grondslag te besoek.
Voedselhantering en verwerking is onderhewig aan baie streng wetgewing wat deel is van die verantwoordelikheid van omgewings-gesondheidsinspekteurs.
Dit is om seker te maak beide die formele- en informele handelaars voldoen aan gesondheidswetgewing.
Niemand mag kos berg, vervoer, uitstal, voorberei of verkoop tensy hulle in besit is van ʼn sertifikaat dat aan al die gesondheidstandaarde voldoen is nie. Die sertifikaat moet duidelik vertoon word.
