Die Nasionale Tesourie (NT) het aangekondig dat hy van plan is om R262,5 miljoen se voorwaardelike toekennings vir die Nelson Mandelabaai-metro (NMBM) terug te hou. Dit volg nadat die metro weer versuim het om sy kapitaalbegroting doeltreffend te bestee.
Die VF Plus het gewaarsku dat hierdie ontwikkeling die NMBM op die rand van nog ‘n finansiële ramp plaas.
Hierdie situasie is vererger deurdat die metro in die vorige boekjaar reeds sowat R430 miljoen verloor het weens die onvermoë van die ANC-geleide koalisie om fondse effektief te bestee. Dit is ‘n duidelike aanduiding van swak finansiële bestuur en wanbestuur van hulpbronne wat kritiek is vir dienslewering aan inwoners.
Die fondse wat nou op die spel is, sluit in:
• R14,5 miljoen vir die informele nedersettings -opgraderingsvennootskaptoelaag;
• R143,4 miljoen vir die ontwikkelingstoelae vir stedelike nedersettings; en
• R104,6 miljoen vir die streeksgrootmaat-infrastruktuurtoelaag
Hierdie bedrae kan ‘n reuse verskil maak in die ontwikkeling en verbetering van infrastruktuur binne die metro. Indien hierdie fondse verlore gaan, sal dienslewering verder agteruitgaan en inwoners sal ongelukkig die gevolge dra van vervallende paaie en water- en kraginfrastruktuur.
Die VF Plus het ook sy kommer uitgespreek oor die ANC en sy koalisievennote se nalatigheid en die gebrek aan aanspreeklikheid vir hul mislukkings. Dit is veral kommerwekkend dat kleiner koalisievennote bloot rubberstempels geword het vir ANC-besluite, sonder om die groter finansiële impak in ag te neem.
Boonop het die ANC se voortdurende interne stryd met die EFF ‘n negatiewe invloed op die metro se administrasie, aangesien hierdie partye meer besorg is oor politieke oorlewing as oor dienslewering.
Die VF Plus eis dat die metro gedesentraliseer word, sodat dorpe soos Uitenhage en Despatch hul eie bestuursvermoë en begrotings kan kry. Die verlies van hierdie fondse sal ‘n ramp wees vir Nelson Mandelabaai, en dit is tyd dat inwoners sien wie werklik begaan is oor goeie bestuur.
