Die Ekurhuleni-metro se vierde kwartaal-prestasieverslag vir April tot einde Junie toon ’n metro onder groot druk waar swak finansiële bestuur en prestasie dienslewering direk raak.
Die volgende blyk duidelik uit die verslag:
• Die handelsbetaal-tot-kontant-verhouding (maatstaf van likiditeit en finansiële gesondheid) was net 20,45% teenoor ’n teiken van 90%.
• Krediteure is gemiddeld eers ná 94 dae betaal (teiken: 60 dae).
• Eskom-krediteure van sowat R1,6 miljard bly uitstaande.
Die verslag wys verder dat die elektrisiteitsnetwerk jare lank onderbelegging, swak instandhouding en bestuursprobleme ervaar het. Die departement van energie het slegs 10 van sy 15 teikens behaal, terwyl inwoners reeds gereeld deur kragonderbrekings geraak word.
Ander departemente toon soortgelyke probleme:
• Die behuisingsmaatskappy se huurinvorderingskoers was net 49%.
• Paaie en vervoer het slegs 72,5% van sy kapitaalbestedingsteiken van 94% bereik en meld dat die herstel- en instandhoudingsbegroting uitgeput is.
• Die diensleweringskoördineringsdepartement het net twee van ses teikens behaal.
Hierdie syfers beklemtoon dat die metro sukkel om inkomste in te vorder, krediteure betyds te betaal en infrastruktuur te onderhou met inwoners en ondernemings wat die gevolge dra.
Die VF Plus het in die jongste raadsvergadering geëis dat oorsigkomitees die mislukte teikens opvolg en dat departemente met herstelplanne, duidelike tydraamwerke en aanspreeklikheid vorendag kom.
Inwoners betaal reeds duur vir munisipale dienste en het die reg om ’n funksionele metro, betroubare infrastruktuur en volhoubare dienslewering te verwag.
