Die Ekurhuleni-metro sal op Donderdag, 11 Junie 2026 ‘n gewysigde begroting vir die 2026/2027-boekjaar aan die raad voorlê.
Dit volg nadat die aanvanklike voorgestelde begroting nie tydens ‘n raadsvergadering op 4 Junie 2026 genoeg steun kon kry nie, nadat die VF Plus daarteen gestem het.
Die VF Plus erken die metro se grondwetlike verpligting om ’n gefinansierde begroting te aanvaar, maar glo dat ’n begroting nie net wetlik korrek moet wees nie, maar ook realisties, bekostigbaar en in die beste belang van inwoners.
Die grootste kommer is dat die aanvanklike begroting steun op ’n invorderingskoers van 90%, terwyl inwoners reeds onder geweldige ekonomiese druk verkeer.
In die voorlegging is uitgewys dat inwoners gekonfronteer word met tariefverhogings van 11% vir water, 8,35% vir sanitasie, tot 9,01% vir elektrisiteit, 3,4% vir vullisverwydering en 2% vir eiendomsbelasting, terwyl dit terselfdertyd op die uitdagings van werkloosheid, swak ekonomiese groei en toenemende finansiële druk op huishoudings wys.
Meer as R14,2 miljard sou begroot word vir werknemersverwante koste, R24,36 miljard vir grootmaat-elektrisiteit, sowat R7,9 miljard vir gekontrakteerde dienste en R6,54 miljard vir skuldwaardevermindering.
Hoewel die voorgestelde verhoging van herstel- en instandhoudingsbesteding na R4,66 miljard verwelkom word, bly die vraag of inwoners werklik verbeterde dienslewering gaan ervaar.
Die VF Plus glo dat inwoners nie voortdurend meer moet betaal terwyl dienslewering in baie gebiede tekortskiet nie.
Op 4 November 2026 kry kiesers die geleentheid om vir die VF Plus te stem vir ’n verantwoordbare en diensgerigte regering in Ekurhuleni.
