Die totale ineenstorting van dienste, en wanadministrasie by die Emfuleni-plaaslike munisipaliteit (Evaton, Sebokeng, Vaal Oewer, Vanderbijlpark, Vereeniging), kan net toegeskryf word aan ‘n gebrek aan politieke wil aan die kant van die ANC om die gebied van totale ondergang te red. Intussen word inwoners se lewe erg benadeel.
Die VF Plus het tydens ‘n besoek van die nasionale raad van provinsies (NRP) se gekose komitee vir samewerkende regering en tradisionele sake (Cogta) aan dié munisipaliteit, knelpunte uitgewys waaronder onreëlmatighede met tenderprosedures, die raad wat hul oorsigrol versaak, die openbare rekeningekomitee wat nie onreëlmatige uitgawes gedurende die 2018/19-finansiele jaar ondersoek het nie en senior bestuur wat nie verantwoordbaar gehou word vir opgeblase werkloosheidversekeringsfonds-uitgawes nie.
Die party is ook van mening dat die finansiële herstelplan onsuksesvol is en daar geen daadwerklike poging is om agterstallige dienstegeld in te samel om so die geldkoffers te verstewig nie.
Die VF Plus het dit onder die komitee se aandag gebring dat die voorsieningsregulasies nie gevolg word met transaksies wat meer as R200 000 beloop nie. In sekere gevalle word mededingers nie uitgenooi om aan ‘n tenderproses deel te neem nie.
Dit is onrusbarend dat die Emfuleni-munisipaliteit nie die hulp van die sakesektor wil aanvaar nie en slegs wil voortbou op hul wankelrige reputasie om die gebied verder in die afgrond in te bestuur.
Die party sal voortgaan om ongerymdhede en die swak administrasie van die ANC-beheerde Emfuleni-munisipaliteit aan die groot klok te hang.
Dit is tyd vir inwoners om ‘n regeringsverandering in Emfuleni teweeg te bring deur met die 2021-plaaslike regeringsverkiesing vir die VF Plus te stem wat al die inwoners van die munisipaliteit se belange op die hart dra.
Navrae: 076 616 2124
;
