Die VF Plus-jeug in Gauteng het gister op Jeugdag hulde gebring aan Roydon Olckers wat op 1 Februarie 2019 tragies gesterf het nadat ‘n loopbrug by die Hoërskool Driehoek in Vanderbijlpark ineen gestort het.
Roydon het twee mede-leerlinge onder die vallende loopbrug uitgestamp, maar in die proses met sy eie lewe geboet.
VF Plus-jeuglede het blomme langs die skoolheining geplaas ter herinnering aan dié dag waar drie leerders tragies gesterf en 23 beseer is.
Roydon se onselfsugtige heldedaad, waar hy mede-leerlinge se lewe bo sy eie gestel het, is ‘n stuk geskiedenis wat nooit vergeet kan word nie en daarom het die VF Plus-jeug in Gauteng Jeugdag aan hom opgedra.
Die instandhouding van alle skoolgeboue is uiters belangrik en daarom sal die VF Plus-jeug voortgaan om druk op die Gautengse departemente vir onderwys en openbare werke te plaas om skoolinfrastruktuur gereeld na te gaan om nog ‘n Hoërskool Driehoek-tragedie te voorkom.
;
