Die VF Plus in Gauteng het met afgryse kennis geneem van die vandalisering van die Kruger-beeldgroep op Kerkplein in die middestad van Pretoria.
Daar is vanoggend gevind dat dele van die beelde van die vier burgers, wat rondom die Kruger-beeld opgerig is as simbool van waaksaamheid, afgesaag is. Dit sluit dele van die gewere en die voete van die beelde in. Die vermoede bestaan dat die vandale skrootmetaalsmouse is wat die beeldhouwerk in die oog gehad het vanweë die waarde van die brons daarin.
Die heining om die beeldegroep, wat al voorheen onder vandale deurgeloop het, het duidelik niks gehelp om die vandale uit te hou nie.
Die VF Plus sal dit nie gelate aanvaar dat Afrikaner-bakens en gedenktekens in die slag bly te midde van die wettelose en ekonomiese klimaat wat die ANC in die land geskep het nie.
Die party dring aan op beter beskerming van dit wat vir die Afrikaner van belang is.
Suid-Afrika – en Oom Paul – verdien beter.
