Die VF Plus neem kennis daarvan dat die parlementêre portefeuljekomitee op openbare werke vandag in die parlement die Wysingswetsontwerp op Onteiening onttrek het.
"Die rede vir die onttrekking van die wetsontwerp is om onteiening sonder vergoeding te bespoedig. Dié proses vereis dat, wanneer die Grondwet gewysig word, die wysiging deur gewone wetgewing moet geskied," sê Pieter Groenewald, VF Plus-leier.
Groenewald sê dit is duidelik dat die ANC hom nie van stryk laat bring deur berade en voorstelle van die landbousektor oor hoe om grondhervorming te versnel nie.
"Die regerende party gaan eensydig voortgaan om die Grondwet te wysig om voorsiening te maak vir onteiening sonder vergoeding
Die ANC mislei die publiek en landbou-organisasies deur voor te gee dat hy planne en voorstelle om grondhervorming te versnel verwelkom. Sodoende wek hy die indruk dat hy nie sal voortgaan met onteiening sonder vergoeding nie.
"Hierdie onttrekking deur die portefeuljekomitee van die wetsontwerp wat reeds in 2015 opgestel is, dien as duidelike bewys dat die ANC die Grondwet sal wysig om onteiening sonder vergoeding moontlik te maak en om Suid-Afrika sodoende op ‘n vernietigingspad te plaas wat sal eindig in ‘n Zimbabwe-situasie," sê Groenewald.
;
