Dit is onaanvaarbaar dat baie gemeenskappe in die Govan Mbeki-plaaslike munisipaliteit al langer as tien dae sonder water is ná Rand Water se beplande instandhoudingswerk wat juis bedoel was om die langtermynbetroubaarheid van die streek se watervoorsiening te verbeter.
Hierdie situasie plaas ’n skerp fokus op die munisipaliteit se verouderde infrastruktuur, gebrekkige noodbeplanning en swak reservoirbestuur.
Ten spyte van Rand Water se waarskuwings dat die herstelproses sou afhang van die munisipaliteit se eie verspreidingsnetwerke en pompstasies, het inwoners van Secunda, Bethal, Trichardt, Evander en omliggende gebiede steeds droë krane.
Hulle is genoodsaak om op watertenkwaens, private skenkings en beperkte noodpunte staat te maak.
Verslae van toegedraaide waterkleppe en teenstrydige herstelpatrone wek verdere vrae oor die bestuur van die stelsel.
Bethal se situasie is besonder kommerwekkend: Inwoners leef reeds nege maande met herhalende watertekorte. Daar bestaan ernstige vrese dat die munisipaliteit doelbewus toevoer beperk om koste te bespaar, eerder as om infrastruktuurprobleme reg te stel. Dit plaas ’n onbillike las op inwoners wat vir ’n diens betaal wat hulle nie ontvang nie.
Die VF Plus doen ’n dringende beroep op die uitvoerende burgemeester, die munisipale administrasie en toepaslike owerhede om:
• Daaglikse, deursigtige terugvoer oor reservoirvlakke, pompvermoë en hersteltye te publiseer.
• ’n Gedetailleerde herstelplan bekend te maak met tydlyne per gebied.
• Alle noodwaterpunte en boorgate 24 uur per dag toeganklik te hou.
• Die beskikbaarheid van watertenkwaens te verbeter en billike verspreiding te verseker.
• ’n Onafhanklike tegniese ondersoek na die waternetwerk te laat doen.
• Dringend te belê in die opgradering van verouderde infrastruktuur.
Indien die munisipaliteit nie die situasie stabiliseer nie, moet die provinsiale regering ingevolge die Grondwet oorweeg om in te gryp om die reg op water te beskerm.
Inwoners verdien deursigtigheid, aanspreeklikheid en daadwerklike leierskap – nie onsekerheid en leë beloftes nie.
Water is ’n basiese mensereg, en die inwoners van Govan Mbeki verdien beter.
Op 4 November het inwoners die geleentheid om van die onbevoegde ANC ontslae te raak en vir die VF Plus te stem wat hul belange eerste stel.
