Die VF Plus neem kennis van die ANC in die Tshwane-metro se plan om ʼn spesiale raadsvergadering te belê om die stadsbestuurder, Johann Mettler, van sy pos te onthef.
Die VF Plus het reeds in September verlede jaar gewaarsku dat daar ʼn aanslag teen die goeie administrasie kom nadat ActionSA die koalisie tussen die DA, VF Plus en ActionSA tot stilstand geruk het.
Hierdie is niks minder nie as ’n poging om plek te maak vir ANC- en EFF-kaders. Dit is berekende strategie om eerlike administrateurs te verwyder en hul plekke te vul met mense wat beheer kan word.
Dié gemotiveerde veldtog het intussen uitgeloop op die poging tot die heraanstelling van vyf senior amptenare wat met tenderbedrog verbind word.
Dit ten spyte van klagtes van die spesiale ondersoekeenheid (SOE) en ’n forensiese verslag wat ernstige oortredings aantoon.
In Januarie 2025 het VF Plus hierdie herstel as ’n gevaar vir regsprosesse en getuienisbestendigheid beskryf en aangedui dat dit ’n boodskap van strafloosheid stuur.
Dis juis Mettler en sy bestuurspan wat in die pad staan van pogings om die administratiewe orde en integriteit van die metro te destabiliseer.
Die VF Plus doen ’n dringende beroep op alle belangegroepe — regsverteenwoordigers, burgerlike organisasies, kerklike liggame, sakekamers en gewone burgers — om meedoënloos, op alle denkbare wettige wyses, teenstand te bied teen hierdie poging tot die kaping van die metro.
Die VF Plus sal altyd opstaan vir regverdigheid en die totstandkoming van ʼn koalisie wat die inwoners van Tshwane eerste stel.
