Die VF Plus het in Mpumalanga-wetgewer beklemtoon dat onwettige jag ’n ernstige bedreiging inhou vir landelike veiligheid, eiendomsreg en die provinsie se natuurlike erfenis.
Die onlangse Howick-landdroshof-uitspraak in KwaZulu-Natal stuur ’n duidelike boodskap dat oortreders kan en moet gestraf word.
Vier mans is skuldig bevind nadat hulle met 16 jaghonde ’n private bewaringsgebied betree het. Die hof het beslis dat selfs ongemagtigde betreding met die bedoeling om te jag voldoende is vir ’n skuldigbevinding. Die vonnis, wat swaar boetes en gevangenisstraf insluit, bevestig dat die regbank wel die instrumente het om streng op te tree.
Die Mpumalanga Wet op Natuurbewaring bied reeds ’n sterk wetlike raamwerk. Hierdie wet verbied onder meer nagjag, die gebruik van strikke en honde, asook ongemagtigde betreding van landbougrond. Afhangend van die erns van die oortreding, maak dit voorsiening vir boetes en gevangenisstraf van tot tien jaar.
Die probleem lê egter by die gebrek aan sigbare polisiëring en daadwerklike wetstoepassing in landelike gebiede. Sonder konsekwente optrede bly hierdie misdade voortduur en rig dit enorme finansiële en ekologiese skade aan.
Die onlangse Badplaas-arrestasie van twee verdagtes met karkasse van wild en vee toon duidelik dat onwettige jag dikwels hand aan hand gaan met veediefstal en ander landelike misdaad.
Dit is daarom belangrik dat die polisie en provinsiale natuurbewaringsbeamptes hul optrede drasties opskerp en dat landdroste in Mpumalanga die bepalings van die wet ten volle benut net soos die Howick-uitspraak bewys dat dit wel moontlik is.
Boere en wildboere is die ruggraat van Mpumalanga se ekonomie en voedselsekerheid. Die beskerming van hul eiendomsreg en die veiligheid van landelike gemeenskappe is nie onderhandelbaar nie.
Die VF Plus sal aanhou veg in die wetgewer vir die onwrikbare beskerming van privaat eiendomsreg en die veiligheid van landelike gemeenskappe.
