fbpx
Vryheidsfront Plus

ANC gebruik nou water om boere van hul grond af te dryf

Die kwota van 75% swart eienaarskap waarna die staat mik in die toekenning van waterlisensies, is ’n deeglik beplande strategie om wit boere van hul plase af te dryf.

Dit is niks anders nie as onteiening sonder vergoeding aangesien die regering water nou wil gebruik as ’n wapen teen boere se koppe om hul eiendom aan swartes oor te gee.

Die VF Plus sal alles in sy vermoë doen om hierdie vernietigende plan van die ANC van die tafel te vee en doen ’n beroep op elke regdenkende mens in die land om hom daarin te steun.

Die ANC met sy rasgedrewe beleid het die punt bereik waar hy so desperaat is om aan die mag vas te klou dat hy bereid is om Suid-Afrika in die proses totaal te vernietig.

Suid-Afrika se landbousektor neem sowat 60% van die land se jaarlikse waterverbruik en dit is duidelik dat dié sektor geteiken word.

Die ANC-regering het skouspelagtig misluk met die totale restitusieprogram en ná 29 jaar is daar steeds geen suksesvolle natuurlike proses om grootskaalse swart deelname aan landbou te bewerkstellig nie.

Die departement van water en sanitasie het verlede Vrydag konsepregulasies in die Staatskoerant gepubliseer wat vereis dat ondernemings wat vir watergebruiklisensies aansoek doen, swart eienaarskap van 75% moet hê.

In die realiteit beteken dit dat alle grootskaalse watergebruikers – die landbousektor in die besonder, maar ook industriële ondernemings waar water gebruik word – feitlik in totaliteit aan swart “aandeelhouers” oorgedra moet word.

Boere en die eienaars van groot ondernemings gaan oornag van eienaar tot arbeider met ’n minderheidsaandeel gereduseer word.

Die gevolge van hierdie regulasies sal katastrofies vir Suid-Afrika wees.

Die land het bykans nie meer krag nie. Water vir gewone gebruik is reeds ’n krisis en nou is die ANC besig met planne om ook kosproduksie te vernietig.

Suid-Afrika se ekonomie is tot só ’n mate vernietig dat kosprodukte nie ingevoer sal kan word nie en die uiteinde sal rampspoedig vir elke Suid-Afrikaner wees.

Wat die ANC hier doen, herinner aan skokkende voorbeelde uit die Sowjet-era waar die staat miljoene van sy eie mense van honger laat omkom het.

Hierdie waarskuwing is baie werklik. Beurtkrag en cholera in die land se water moet dien as tydige bewys en waarskuwing.

Dit is duidelik dat die ANC nou bereid is om die land te vernietig om steun by die stembus te behou. Dit mag nie gebeur nie.

Aanstaande jaar bied die geleentheid om oplaas van ANC-nagmerrie ontslae te raak.

DEEL DIT:

jongste artikels

Van die VF Plus se politieke lessenaar
Dalien Steyn

Meningspeilings en verkiesingsuitslae

Daar is die afgelope ruk byna elke week ʼn nuwe meningspeiling wat voorspel hoe politieke partye in die komende verkiesing gaan vaar.

Die jongste dag-tot-dag-meningspeiling van die Social Research Foundation (SRF) dui daarop dat die ANC nou voorloop in KwaZulu-Natal nadat hy sy groot kanonne ingestuur het om in die provinsie stemme te werf.

LEES MEER
Jongste nuus
Amanda de Lange

Lesufi faal welsynsorganisasies

Die Gautengse premier, Panyaza Lesufi en die LUR vir maatskaplike ontwikkeling, Mbali Hlope, se krisisbestuur om welsynsorganisasies wat nog nie hul diensooreenkomste ontvang het nie

LEES MEER
Wil jy voortgaan in Afrikaans of Engels?

Kies hieronder.

Would you like to continue in English or Afrikaans?

Choose below.