(Begrotingsposdebat in parlement: Presidensie)
Die president van Suid-Afrika het nie net ’n plig om ’n volhoubare ontwikkelingsomgewing vir die staat te skep nie, maar ook om ’n bevoegde en effektiewe polisiediens daar te stel om die land se inwoners en hul eiendom teen misdadigers te beskerm.
Dit gebeur tans nie en daarom is pogings om die publiek te verbied om vuurwapens vir selfverdediging te besit, onsinnig.
Daar is talle voorbeelde oor hoe die polisie misluk in die uitvoering van sy grondwetlike mandaat. Een is die huidige fiasko met DNS-toetse asook die onvermoë om geslagsgeweld aan bande te lê.
President Cyril Ramaphosa het self op 6 Mei vanjaar in ’n vraesessie in die parlement gesê daar was op 25 April vanjaar meer as 83 000 sake van geslagsgeweld wat ondersoek is en hiervan was meer as 77 000 van die sake ouer as 35 kalenderdae.
Baie van hierdie 83 000 saakdossiere bevat wel ’n aantal DNS-monsters van die betrokke misdaadtoneel. ’n Besoek van die parlement se portefeuljekomitee aan die polisie se forensiese laboratoriums, het aan die lig gebring dat dit sowat agtien maande sal neem net om die agterstand uit te wis indien al die laboratoriums optimaal funksioneer.
Dit is nie die geval nie wat beteken dat baie slagoffers van geslagsgeweld tot twee jaar lank sal moet wag vir van die DNS-toetse om gedoen te word wat van kardinale belang is ’n skuldigbevinding te kry, veral in verkragtingsake.
Die polisiekommissaris, genl. Khehla Sitole, het in Oktober 2018 reeds gesê die polisie het ‘n veeldoelige diens geraak met ‘n onbegonne en onuitvoerbare mandaat vanweë die totale mislukking van die Nasionale Misdaadvoorkomingstrategie (NMVS).
Hierdie onbegonne mandaat kan deels toegeskryf word aan die feit dat die ANC-regering vanaf 2000 tot 2017 onbevoegde nasionale kommissarisse soos ‘n diplomaat, ‘n politikus en ‘n maatskaplike werker aangestel het wat nie in staat was om die werk te doen nie.
Die onlangse gebeure by Zandspruit waar agt mense vermoor is, is ‘n voorbeeld waar die gemeenskap die reg in eie hande neem. Volgens die Instituut vir Sekerheidstudies (ISS) word ten minste twee mense per dag vermoor wanneer die gemeenskap reg in eie hande neem.
Nou dreig die minister van polisie, Bheki Cele, om die Vuurwapenwet aan te pas om die publiek te verbied om ‘n vuurwapen vir selfverdediging te besit.
Hoe kan van die publiek verwag word om weerloos te staan teen misdadigers met ‘n polisiemag wat hulle nie kan beskerm nie? ‘n Boer mag dan nie meer ‘n vuurwapen besit om hom, sy gesin en sy werkers te beskerm nie. Net so mag ‘n winkeleienaar in Soweto homself nie teen rowers beskerm nie.
Die VF Plus doen ‘n dringende beroep op president Ramaphosa self om hierdie wetsaanpassing te keer aangesien dit niks anders as waansin is nie.
;
