Die moord op 'n bejaarde vrou en die ernstige aanranding van haar man op 'n plaas naby Olifantshoek in die Noord-Kaap, stuur opnuut skokgolwe deur dié rustige provinsie.
Die plaas is sowat 15km buite die dorp op die N14-hoofroete.
Die VF Plus spreek sy medelye uit met die oorlewende van die aanval, asook met die egpaar se naasbestaandes en vriende. Hierdie moord laat opnuut die kalklig op die verslegtende veiligheid in plattelandse gebiede val.
Volgens die polisie se woordvoerder in die Noord-Kaap, is die vrou se vasgebinde liggaam vanoggend in die huis gevind. Haar man kon homself bevry en is in die veld gevind. Hy ontvang tans mediese behandeling.
Volgens aanduidings was die aanvallers werknemers van die egpaar en bes moontlik buitelandse burgers.
Die aanval vestig die aandag op verskillende sake wat in werklikheid reeds bekend is: Kwesbare mense word in aanvalle geteiken, 'n maklik bereikbare ontsnaproete help misdadigers om weg te kom en die oënskynlike rustigheid van 'n omgewing kan misleidend wees.
Die VF Plus weerhou hom van verdere kommentaar totdat meer besonderhede bekend is. Verklarings wat op valse inligting gegrond is, kan soms meer doen om gemoedere op te jaag as wat dit help om toekomstige aanvalle te voorkom.
;
