VF Plus gekant teen EFF-voorstel om Kaapstad-lughawe se naam te verander

2019-03-05
Die Redaksie

"Die gebruik van name om plekke soos ʼn lughawe te benoem is ʼn kontensieuse onderwerp wat weens meningsverskille altyd gemoedere gaande sal maak en die VF Plus verkies daarom dat geografiese name gebruik word."

So het dr Corné Mulder, VF Plus-hoofsweep Disndg tydens 'n parlementêre debat oor die naamsverandering van die Kaapstad-lughawe gesê.

"Indien ʼn persoon se naam wel gebruik moet word vir die herbenoeming van ʼn plek soos Kaapstad se lughawe, is dit wenslik om ʼn sinvolle naam te gebruik. Die VF Plus is daarom ten sterkste gekant teen die EFF-voorstel om die naam van Winnie Madikizela-Mandela te gebruik.

"In die Wes-Kaap se geval moet die inheemse, of Eerste Mense van die provinsie se gevoelens gerespekteer word. Dit is mense wat in hierdie geval ook ʼn minderheid in Suid-Afrika is.

"In só ʼn geval maak dit sin dat die naam Krotoa oorweeg word. Sy is ʼn histories Kaapse figuur wat beskou word as die moeder van Suid-Afrika se Khoi-stamme. Sodoende sou ook erkenning gegee word aan die land se Eerste Mense.

"Dit is nogtans verkieslik dat geografiese name behou word. Daar is ander maniere om erkenning te gee aan geskiedkundige figure," het Mulder gesê.

 

 


Het jy dit interessant gevind? Deel dit!