Bekendstelling van VF Plus-manifes 2021: Die verval kan gestop word

2021-10-09
Dr Pieter Groenewald

Die VF Plus se manifes vir die plaaslike regeringsverkiesing op 1 November is ʼn boodskap van hoop. ʼn Boodskap dat dit wel moontlik is om die verval van plaaslike regering in Suid-Afrika te stuit en te stuur in ʼn rigting wat tot voordeel van almal in Suid-Afrika sal wees.

Dit word duidelik uitgespel in die VF Plus se Tienpuntplan wat die kern van sy Manifes-2021 vorm. (Die volledige manifes word hierby aangeheg.)

Die verval van dorpe en stede is duidelik sigbaar. Inwoners word oorbelas en ontvang nie waarde vir geld nie.

Hierdie verval belemmer ekonomiese groei en werkskepping. Geen sakeonderneming kan floreer terwyl daar gebrekkige infrastruktuur en dienslewering is nie.

Die ANC het bewys dat hy nie kan regeer nie. Dit is ook bewys dat waar ʼn politieke party alleen regeer en te veel mag het, dit tot magsmisbruik, politiekery, korrupsie en verkeerde prioriteite lei.

Die oorsake van korrupsie, wanbestuur, beurtkrag en -water, besoedeling en swak dienslewering, kan voor die deur van die ANC se beleidsrigting geplaas word.

Die VF Plus staan op teen hierdie beleid en bied hoop vir ʼn beter toekoms met gelyke geleenthede vir almal.

Die party se span parlementslede, provinsiale wetgewerlede, munisipale raadslede, personeel, aktiviste en vrywilligers het bewys dat hulle die gemeenskap dien, effektiewe opposisie bied, probleme oplos en kan regeer daar waar die VF Plus tans deel van veelpartyregerings is.

Die VF Plus se 2021-Manifes verduidelik die konkrete oplossings wat die party se beleid bied wat dienslewering en munisipale bestuur sal verbeter.

Vandag se Manifes 2021-bekendstelling het hibried plaasgevind met lede regoor die land wat ook via 'n virtuele platform ingeskakel het. Dit is ook regstreeks op sosiale media uitgesaai.


Het jy dit interessant gevind? Deel dit!