ANC moet kennis neem daarvan dat die mense van Suid-Afrika weerstandig raak teen regerings se vermorsing van hul belastinggeld

2020-07-29
Die Redaksie

"Die VF Plus wil sy boodskap herhaal dat die belastingbetalers van Suid-Afrika weerstandig begin raak teen die regering se vermorsing van belastinggeld. Hulle wil nie meer betaal as dienste nie gelewer word en belastinggeld gesteel word nie," sê dr. Pieter Groenewald, VF Plus-leier.

"Die mense van Suid-Afrika raak keelvol daarvoor dat hul swaarverdiende geld vermors word. Hulle gaan op ʼn punt kom waar daar ʼn spontane weerhouding van belasting gaan plaasvind. Die e-tolstelsel is die perfekte voorbeeld van waar die mense gesê het genoeg is genoeg. 

"Die minister van finansies, Tito Mboweni, erken self dat slegs ingrypende strukturele hervorming van die ekonomie gegrond op gesonde sakebeginsels, die enigste wyse is om die land se benarde ekonomiese situasie om te draai.

 

"Hy weet waarvan hy praat. Hy is ʼn voormalige goewerneur van die Reserwebank, hy is bevoeg, het die kundigheid en hy weet hoe die land se ekonomie werk. Hy sit egter met die probleem dat sy hande gebind word deur die ideologiese beleidstandpunte van die ANC."

 

 

"Die minister gaan so ver as om op sosiale media te sê die ANC se ideologiese houvas op die ekonomie laat dit soms vir hom voel of hy ʼn rots moet sluk. Die VF Plus wil aan die minister sê politiek en oorlog is baie dieselfde.  Die enigste verskil is net dat ʼn mens in oorlog net een keer gedood word. In die politiek gebeur dit gereeld.

"Die minister moet homself afvra hoeveel keer hy nog figuurlik gesproke doodgemaak moet word voordat die ANC gaan luister.

"Met die aanvang van die Covid-19-inperkings en president Cyril Ramaphosa se aankondiging van die R500 miljard noodfonds, het die president gesê die regering sal “seker maak” dat daar nie enige wanaanwending van die geld is nie.

 

"Intussen het korrupsie hoogty gevier. Die media berig gereeld daaroor. Net in Gauteng is sprake van meer as R2 miljard se korrupsie waarby geld van die noodfonds betrokke is. Dit is só erg dat die president nou selfs ʼn spesiale eenheid moes aanwys om die korrupsie te ondersoek."

 

"Oor hierdie korrupsie het minister Mboweni gesê ʼn tender is grotendeels ʼn “etiese” kontrak en nie ʼn blanko tjek vir korruptes om te bedrieg en te steel nie. Tog is dit presies wat gebeur.

"Die mense van Suid-Afrika sien dit raak. Hulle is moeg daarvoor. Die regering moet nou vinnig sy huis in orde kry om ʼn belasting-opstand te keer," sê Groenewald.

 

DrPieterGroenewaldKorrupsieBelastingbetalersgeld#Covid19SAaanpassingsbegroting

Het jy dit interessant gevind? Deel dit!