VF Plus wil weet wie gaan nou nuwe ombudsman vir gesondheid word na Eskom-aanstelling van prof. Makgoba

2020-01-17
Philip van Staden

Die VF Plus het met kommer kennis geneem van die aanstelling van prof. Malegapuru Makgoba as Eskom se tussentydse voorsitter. Prof. Makgoba was nog die ombudsman vir gesondheid tydens ‘n sitting van die portefeuljekomitee vir gesondheid in Oktober 2019.

Nie net spreek die VF Plus sy kommer uit oor die aanstelling aangesien prof. Makgoba ‘n leemte gaan laat in gesondheid nie, maar ook omdat die party meen sy aanstelling kan nie van enige waarde vir Eskom se probleme wees nie.

Prof. Makgoba was ‘n puik ombudsman in die rol wat hy in die Life Esidimeni-tragedie gespeel het. Daar is egter ‘n groot verskil tussen die mediese wêreld en die groot probleme wat tans by Eskom ondervind word. Die VF Plus is van mening dat hierdie twee velde wêrelde van mekaar verwyder is.

Prof. Makgoba het tydens ‘n sitting van die portefeuljekomitee vir gesondheid in Oktober 2019, voor die komitee gekla dat sy kantoor bykans geen bystand kry van die staat nie en dat sy kantoor moet klaarkom met net homself en ‘n sekretaresse.

Makgoba het tydens die vergadering verduidelik hoe effektief en groot die kantore van die ombudsman van Brittanje en Amerika is.

Die VF Plus het toe die hoop uitgespreek dat die ombudsman se hulpbronne uitgebrei kan word om al die mediese klagtes wat vanaf die publiek instroom, effektief te kan ondersoek en afhandel.

Die VF Plus wil sien dat daar so gou doenlik ‘n nuwe ombudsman vir gesondheid aangewys word wat oor dieselfde mediese kennis as prof. Makgoba beskik en dat daar hopelik meer aandag aan die kantoor van die ombudsman geskenk sal word.

Dit sou die regte ding wees om te doen om eerder vir prof. Makgoba as ombudsman vir gesondheid te hou en hom uit Eskom se strukture te verwyder sodat sy kennis en talente ten volle benut kan word in die mediese wêreld waar daar omvanryke krisisse in die land se hospitale is weens nalatigheid.


Kontaknommer: 060 556 4347

PhilipVanStadenGesondheid

Het jy dit interessant gevind? Deel dit!