IManifesto kunye noLwakhelo loMgaqo-nkqubo ze-FF Plus zisebenza njengesicwangciso sokwakha isizwe ukuze kusonjululwe ezona ngxaki ziphambili zoMzantsi Afrika kwaye kubuyiselwe izinto emgangathweni. Oku kulandelayo kungundoqo wesi sicwangciso sokwakhiwa kwesizwe:

• Ukukhuthazwa kwenkqubo yorhwebelwano olukhululekileyo kunye nokufikelela ngokulinganayo kumathuba akhoyo.
• Ukumiselwa korhulumente ophambili omncinci nosabela ngokukhawuleza kunoku, nongaphazamisani kakhulu nobomi babahlali.
• Ukukhuthazwa kwesizwe apho wonke umntu elingana ngokomthetho kunye nokupheliswa kwazo zonke iintlobo zobuqhophololo.
• Ukupheliswa kweAffirmative Action neBlack Economic Empowerment esekelwe kuhlanga; kusetyenziswe iimeko zoqoqosho nentlalo njengemimiselo yokuxhobisa abantu nokukhuthaza amathuba alinganayo kumntu wonke.
• Ukufezekiswa kwelungelo lokuzilawula koluntu ngokomgaqo-siseko, elamkelwayo ngamazwe ngamazwe.
• Ukumiselwa kwamabhunga oluntu.
• Ukunikwa kwamaphondo inkululeko yokuziphatha eyongezelelweyo.
• Ukumiselwa kwenkqubo yorhulumente wasekuhlaleni omncinane nangakumbi nonemisebenzi ejolise ekuhlaleni nangakumbi.
• Ukumiselwa kweyunithi yokuphandwa kwamatyala akhethekileyo ukuze kuphandwe imisetyenzana yamagosa kamasipala etyholwa ngokungabi semthethweni – kuqukwa ukwaphulwa kwemithetho yezemimandla esingqongileyo.
• Ukuncitshiswa kwenkcitho karhulumente; ukuthengiswa kwamaziko oshishino aphantsi korhlulumente; ukunyuswa kwengeniso karhlumente ngokuvuselela ukukhula koshishino; kubonelelwe ngezaphulelo zerhafu; kwaye kumiselwe ikhomishoni yokujongana nemali karhulumente.
• Ukukhuselwa kwamalungelo eempahla zabucala.
• Ukutyalwa kwemali kukuphuculwa nokulondolozwa kwegridi yokuhambisa umbane; kuhlangabezwe ukubiwa kombane kwaye kukhuselwe iziseko zokusebenza zombane; kukhuthazwe ukutshintshela kwimithombo yombane ehlaziyekayo, njengeephaneli zombane welanga; kugqityezelwe ukucazululwa kukaEskom abe ngamashishini awohlukeneyo; kuncitshiswe ukubanjwa nokulityaziswa kwezigqibo ezayamene nokukhutshwa kweelayisensi zokuvelisa umbane; kwaye kwenziwe iimeko zolawulo ezikuxabisileyo ukuveliswa kombane ziinkampani zabucala kunye nokhuphiswa kweli candelo loshishino.
• Kulungiswe imithetho yezengqesho enemiqathango engqongqo ukuze kukhuthazwe ukudalwa kwemisebenzi kube kugcinwa izithethe zezengqesho ezinobulungisa; kudalwe iimeko ezixabisa ukudalwa kwemisebenzi eyongezelelweyo ngamashishini abucala; kupheliswe isithethe esingathwalekiyo sokudala imisebenzi kukarhulumente.
• Kugcinwe ezemfundo ezinomgangatho ophezulu apho ukufundiswa ngolwimi lwenkobe kufikeleleka kumntu wonke ukuya kufika kwelona nqanaba liphezulu linokuba kho, kwaye kuqhutywe ngabazali kunye noluntu.
• Ukuphuhliswa koqoqosho lwasekuhlaleni oluzimeleyo kunye nokumiselwa kweeZowuni zoQoqosho Ezikhethekileyo.
• Kuqaliswe ukukhuselwa kweentlawulo ezibhataliswayo, uphando, ukuphoziswa ngexesha leentlekele kunye nokwakhiwa kweziseko zokusebenza ukuze kube nokuzuza amafama azilimelayo nalimela urhwebo.
• Ukuphuhliswa kolwakhelo lwemigaqo-nkqubo oluxabisa imimandla esingqongileyo nokunyanzelisa kakuhle imithetho yezemimandla esingqongileyo ukuze kudalwe iimeko ezilulutho zemisebenzi ethwalekayo yezolimo, ezamahlathi kunye nezokuloba.
• Ukunikezwa kwamanani asikelwe ukuloba ngemilinganiselo emincinci kuluntu oluhlala kwiingingqi eziselunxwemeni nezikufutshane kulo, ngelixa kuthintelwa iinkampani zobuvuvu kunye nokuvuyelelwa kwendalo.
• Eli lizwe kufanele liyeke iimveliso, izithethe kunye nemithombo yombane etshabalalisa imimandla esingqongileyo; kuyekiswe ukungcoliswa kwaye kukhuthazwe ukurisayikilisha; kubekwe phambili ukusetyenziswa kombane ohlaziyekayo; kubonelelwe ngezaphulelo zerhafu kubantu nakumashishini asebenzisa imithombo eyenye yombane.
• Ukuqaliswa kwamanyathelo okuthintela ukugecwa kwamahlathi kwaye kukhuthazwe ukubuyiselwa emgangathweni komhlaba apho bekugecwe khona amahlathi.
• Ukuhlangabezana nokusilela kwenkqubo yezobulungisa yolwaphulo-mthetho ukuze kupheliswe ubundlobongela obusekelwe kwisini kunye nodlwengulo kweli lizwe.
• Ukubuyisela emgangathweni umthetho kunye nokuhlalisana ngokumisela iiyunithi ezikhethekileyo zolwaphulo-mthetho olunobundlobongela, ukuthengiswa kwabantwana nabantu, ulwaphulo-mthetho olwenziwa ngamaqela asekiweyo, ubundlobongela bamaqela ootsotsi, ukuthengiswa kweziyobisi kunye nokubulawa kwamafama.
• Ukubonelela ngonakekelo lwempilo olusemgangathweni ngokuthi kubekwe phambili izakhono endaweni yeenguqu; kuyekwe ukulawulwa ngqongqo kweemedikhali eyidi; kuphuculwe iziseko zokusebenza zonakekelo lwempilo lukawonke-wonke; kumiselwe intsebenziswano phakathi kwamacandelo oshishino karhulumente nawabucala; kurhoxiswe i-NHI Bill.
• Ukukhuthazwa kwamalungelo eelwimi kunye nokusetyenziswa kweelwimi ezininzi.
• Ukwakhiwa kobudlelwane namazwe angaphandle ngokusekelwe kukuhloniphana kwaye kukhethwe amazwe asele enobudlelwane bezorhwebo obomeleleyo okanye anakho ukubumisela.
• Ukuqinisekiswa kolawulo lwemida olubuyisela emgangathweni ukunyaniseka kwemida yelizwe lethu nokuphelisa ukuthutyeleziswa kwezinto ezingekho mthethweni, ezifana nemipu kunye neziyobisi, ziweliswe imida yethu kwakunye nokungena kwabantu ngokungekho semthethweni.